Baykonur kosmodromundan Beynəlxalq kosmik stansiyaya yollanmazdan əvvəl kosmonavtlar adətən “Səhranın bəyaz günəşi” filmini izləyirlər.
Sözügedən film 1969-cu ildə çəkilib. Rejissoru Vladimir Motil, ssenari müəllifləri Rüstəm İbrahimbəyov və Valentin Yejovdur. Film vətəndaş müharibəsi illərində Abdulla və hərəmlərini quldurlardan xilas edən Suxov adlı qızılorduçudan bəhs edir.
Film Eksperimental Yaradıcılıq Studiyasında “Mosfilm” və “Lenfilm” istehsalat bazasında çəkilib. Sovet kinematoqrafının ən məşhur filmidir, qəhrəmanların replikaları zərb məsəldir. Çoxarvadlılıq kimi şərq motivi bu sovet filminə özəllik və populyarlıq gətirib. Anatoliy Kuznetsov, Kaxi Kavsadze, Tatyana Fedotova kimi aktyorların çəkildiyi film həm də 1998-ci ildə Rusiyanın Dövlət Mükafatına layiq görülüb.
Buna qədər yazılanlarda bu filmlə kosmonavtlar arasında hansısa əlaqə tapmaq çətindir. Sirrin üstünü “Soyuz TMA-17” kosmik gəmisinin kapitanı açır: “Bu film ekipajı çəkilişlərə hazırlamaq üçündür”.
“Səhranın bəyaz günəşi” filmi kosmonavtlara kinoçəkilişi öyrətmək üçün dərs vəsaiti kimi istifadə olunur. Planın qurulmasını, kamera qoyuluşunu, məkanın seçimini və s. öyrənmək üçün bu film çox idealdır.
“Səhranın bəyaz günəşi” bu mənada operator işi üçün etalondur. Xatırladaq ki, filmin operatoru Eduard Rozovskiydir.
Ən çox baxılan sovet filminə ən çox baxan kosmonavtlar imiş.
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
