Bu gün Azərbaycanın görkəmli rejissorlarından olan Hüseyn Seyidzadənin doğum günüdür. O, Azərbaycan kino tarixinə qızıl hərflərlə yazılmış “O, olmasın, bu olsun”, “Dəli Kür”, “Qayınana” və başqa filmlərə rejissor kimi imza atıb.

Kulis.az rejissorun doğum günü münasibətilə onun şah əsəri olan “O, olmasın, bu olsun” filmi haqqında 10 maraqlı faktı təqdim edir.

1. Film Azərbaycanın ilk rəngli bədii filmidir.

2. Yengə rolunu oynayan aktrisa Münəvvər Kələntərlinin qapının dəliyindən içəri baxarkən Sərvərin çıxması ilə yıxıldığı səhnədə aktrisanın kiçik barmağı sınmışdı. Buna baxmayaraq, M. Kələntərli çəkilişi saxlamamış, roluna professional şəkildə davam etmişdi. Çəkiliş qrupu isə aktrisanın barmağının sınmasından həmin günün çəkilişləri bitəndən sonra xəbərdar olmuşdu.

3. Bəstəkar Üzeyir Hacıbəyovun eyni adlı operettası əsasında ekranlaşdırılmış filmdə xanəndə Xan Şuşinski qonaqlıq səhnəsində "Kürd-Şahnaz" muğamını ifa edir. Bu ifa təkcə musiqi sənəti baxımından bənzərsizliyi ilə seçilmir, həm də kinoda musiqinin rolunu izah etmək üçün dərsliklərə salınıb.

4. İran, İraq, Yuqoslaviya, Yaponiya, Avstriya, ABŞ, İsveçrə, Macarıstan və digər ölkələrə satılan film xarici tamaşaçılar tərəfindən uğurla qarşılansa da, Bakı kinoteatrlarında nümayiş etdiriləndən sonra respublika mətbuatında "Müvəffəqiyyətsiz film" başlıqlı kəskin tənqidi resenziya dərc edilmişdi.

5. Çəkilişləri il yarım davam edən filmdə əsas rollarda oynayan aktyorlar həmin dövrün pulu ilə hər çəkiliş günü üçün 60 manat qonorar alıblar.

6. Filmdə Gülnaz rolunu oynayan Tamara Gözəlova sonra başqa filmlərdən təkliflər alsa da, bir daha filmə çəkilməyib. Gülnaz onun ilk və son roludur.

7. Əslində, Məşədi İbad rolu üçün rejissor Hüseyn Seyidzadə aktyor Mirzəağa Əliyevi çəkəcəkdi. Lakin çəkilişlər başlayan ərəfədə aktyor vəfat etdiyi üçün rol Əliağa Ağayevə qismət olur. Bu rol Əliağa Ağayevə çatana qədər bir neçə aktyorun üzərindən ötüb. Hətta, filmə çəkilmək üçün ən real namizəd Xalq artisti Mirzə Babayev idi. O, çəkilişlərə tam hazırlanmışdı. Filmin baş operatoru Əlisəttar Atakişiyev son anda Əliağa Ağayevin oynadığı tamaşaya baxır, onu da rola təklif edir. Maraqlıdır ki, Hüseyn Seyidzadə son qərarını son tapıntı üzərində saxlayır və Məşədi İbad rolunda Əliağa Ağayev oynayır. Mirzə Babayev yalnız Məşədi İbadın mahnı və muğamlarını oxuyur.

8. Sərvər roluna Rəşid Behbudov təsdiqlənir. Hətta həmin ərəfədə Rəşidə gələn bəzi məktublarda ona “Sərvər” deyə müraciət edir, bu rola görə öncədən təbrik edirdilər Lakin Rəşid obraz haqqında xeyli düşünəndən sonra çəkilişdən imtina edir və öz qərarını belə əsaslandırır: “Sərvər gimnaziyada oxuyan tələbədir, mənim isə artıq 40 yaşım var”.

9. Filmin qonaqlıq səhnəsində dava zamanı istifadə olunan qablar bişmiş gildən idi, ona görə harasa dəyən kimi parça-parça olurdu. Lakin Lütfəli Abdullayevin Məmməd Zəkinin başına vurduğu qab əsl materialdan olduğu üçün aktyorun başı yarılır və çəkilişə təcili yardım çağırılır.

10. Filmin Ərəbistanda nümayişi planlaşdırılırdı. Səfər Moskvadan ləğv olunur. Dünya şöhrətli rejissor Sergey Bondarçuk məsələyə etiraz edir. O, bildirir ki, öz filmi qala-qala “O, olmasın, bu olsun” Ərəbistana gedə bilməz.

• "Kinomexanikin qayıdışı" Ən yaxşı sənədli film seçildi
• Tarkovskinin qeydləri 1,5 milyon rubla satıldı
• Ancelina Colinin rol alacağı yeni filmi bəlli olub