Kulis.az sayt rəhbərlərinə “Hansı xəbərləriniz daha çox oxunur?” sualı ilə müraciət edib. Cavabları təqdim edirik.

Aznews.az-ın baş redaktoru Elçin Zahiroğlu: “Saytda hansı xəbərlərin oxunması gündəmlə bağlıdır. İqtisadiyyat xəbərləri az oxunurdu, axır vaxtlar bu sahəyə aid məlumatların oxunma sayı artıb. Məsələn, bu həftə ən çox oxunan xəbərimizin adı belədir: “Neft bahalaşdı”. 35 minə yaxın oxunan, sadə başlıqlı bu xəbər başqa vaxtda heç 1000 dəfə də oxumazdı. Ümumilikdə götürəndə bizdə siyasi və sosial xəbərlər, şou, “yüngül” xəbərlərə nisbətən daha çox oxucu diqqəti çəkir. Ağır, araşdırma yazılara marağın gün-gündən artdığı hiss olunur”.

Modern.az-ın redaktoru Əfqan Qafarlı: “Əksər xəbər saytlarını və agentlikləri izləməyə çalışıram. Ümumi mənzərə, təəssüf, belədir ki, internet oxucusu nədənsə şou və kriminal xəbərlərə, seks, intim həyatla bağlı materiallara acgözlüklə baxır.

Modern.az saytı da kriminal və şou xəbərlərə, “intim məsələlərinə” az yer verir. Belə xəbərlərin yalnız böyük səs-küy doğuranlarını dərc edirik. Buna görə bəziləri hətta bizi qınayırlar ki, “saytınız həddindən artıq quru və ciddi” xətt tutub.

Modern.az-da ən çox oxunan materiallara gəldikdə bunlar əsasən özəl xəbərlərimiz, araşdırma və müsahibələrimiz olur. Bəzən maraqlı köşə yazıları da çox oxunanlar siyahısına düşür”.

Qafqazinfo.az-ın baş redaktoru Elbrus Ərud əsasən ciddi xəbərlərin, tənqidi yazıların daha çox oxunduğunu deyir. Onun sözlərinə görə, Qarabağda baş verən olaylar, regional siyasətlə bağlı yazılar da oxucunun diqqətini çəkir. Çox oxunan yazılar sırasında şou və kriminal xəbərlər də üstünlük təşkil edir.

Lent.az İnformasiya Agentliyinin direktor müavini Səbuhi Məmmədli: “Təbii ki, kriminal daha çox oxunur. Və mən təqdirəlayiq hesab etmirəm. Kriminal xəbərlərin daha çox oxunması isə sükunətlə bağlıdır, ölkədə başqa hadisə yoxdur”.

• Tanınmış müğənninin xatirəsinə muzey açıldı
• Rejissor Elxan Cəfərov: "Uzun müddət məni “Kinostudiyanın Mauqlisi” adlandırıblar..." - Müsahibə
• Cudi Denç “Pişiklər” filmini tənqid etdi: “İstedadın və etimadın israfı”