Azərbaycan Yazıçılar Birliyi tərəfindən (AYB) təsis olunan mükafatlara dəyişiklik edilib. Bu barədə Kulis.az-a mükafat komissiyasının katibi Fərid Hüseyn məlumat verib. F. Hüseynin sözlərinə görə 5-ci nominasiya - “Azərbaycan haqqında yazılmış ən yaxşı publisistik əsərə görə – Nəcəf Nəcəfov” mükafatı ölkədən kənardakı publisistlər üçün nəzərdə tutulsa da ölkəmizdəki publisistlər mükafata iddia edə biləcək: “Bildiyiniz kimi 5-ci nominasiya ölkəmizdən kənardakı publisistlər üçün nəzərdə tutulmuşdu. Lakin həm əsər qəbulunun azlığına görə, həm də ölkədəki publisistləri cəlb etmək üçün “ölkəmiz” sözünü əlavə etdik”.

AYB-nin təsis etdiyi mükafata əsər qəbulunu Slavyan Universitetində aparılmasına aydınlıq gətirən F. Hüseyn AYB-nin maliyyəsi ilə təşkil olunacaq mükafatın xüsusi sponsoru olmadığını söylədi: “Hər hansı bir şəxs mükafata yardım göstərmək istəsə ona şərait yaradılacaq. Sədr Kamal müəllimdir. Katib kimi isə əsərlərin qəbuluna mən baxıram. Əsərlər əldən-ələ, AYB-dən Slavyan Universitetinə gəlməsin deyə, həm də əsas korpus şəhərin mərkəzinə yaxın olduğu üçün fikirləşdik ki, yazılar vahid mərkəzdən qəbul edilsin”.

Münsiflər heyətinin AYB tərəfindən müəyyənləşdirildiyini bildirən katib AYB üzvü olmayanların da əsər təqdim edə biləcəklərini qeyd etdi: “Bütün dillərdə olan əsərlər qəbul olunacaq. AYB üzvü olan, olmayan hər kəsə şərait yaradılıb. Münsiflər heyətinə də peşəkar ədəbiyyat adamları seçilib”.

Qeyd edək ki, AYB 5 nominasiya üzrə mükafatlar təsis edib. Ən yaxşı nəsr əsərinə görə – Yusif Səmədoğlu, ən yaxşı poetik əsərə görə – Əli Kərim, ən yaxşı tənqid və esseistik əsərə görə – Yaşar Qarayev, ən yaxşı tərcümə əsərinə görə – Abbas Səhhət mükafatı, Azərbaycan haqqında yazılmış ən yaxşı publisistik əsərə görə –Nəcəf Nəcəfov mükafatı veriləcək. Mükafatlar iki ildə bir dəfə (2013-cü ildən başlayaraq) son iki ildə yaranmış əsərlərə veriləcək. Mükafatların hər birinin dəyəri 2 min manat müəyyən edilib.

Elektron mətnlər və əlyazmalar qəbul edilmir. Müəlliflərdən əsərin 3 nüsxəsi və qısa əbədi bioqrafiyaları tələb olunur. Hər müəllif yalnız bir nominasiya üzrə əsər təqdim edə bilər.

Mükafat komissiyasının sədri yazıçı Kamal Abdulla, üzvləri Azər Mustafazadə, Vaqif Səmədoğlu, Mövlud Süleymanlı, Ramiz Rövşən, Əjdər Ol, Salam Sarvan, Bəsti Əlibəyli, İlqar Fəhmidir. Komissiyanın katibi isə Fərid Hüseyndir.

Fərid MİRZƏYEV

• Evində timsah saxlayan şair - O niyə milçəyinin dəfninə milyon dollar xərcləmişdi?
• Postmoderndə modernizmin əl izi: Oğuz Atay və Kafka - Elnarə Qaragözova
• Xristianlığı qəbul edən qeyri-adi titullu aktyorumuz - Klounlar ona niyə təzim edirdilər?