İyulun 18-də Norveç səfirinin evində şair Səlim Babullaoğlu ilə görüş və poeziya axşamı keçirilib. Kulis.Az-ın verdiyi məlumata görə tədbirdə bir çox ölkələrin Azərbaycandakı səfirləri, beynəlxalq təşkilatların nümayəndələri, diplomatik korpusun nümayəndələri iştirak ediblər.

Tədbirin təşkilatçısı və moderatoru Norveç Krallığının Azərbaycandakı fövqəladə və səlahiyyətli səfirinin xanımı Astrid Schnitzer axşamı giriş sözü açaraq Səlim Babullaoğlu haqda məlumat verib, şairin həm orijinal, həm də ingilis dilində olan şeirlərindən ibarət səfirlik tərəfindən hazırlanmış bukleti qonaqlara təqdim edib.

Səlim Babullaoğlu da öz növbəsində həm xanım Astrid Schnitzerə, həm də səfir cənab Erling Skjonsbergə təşəkkür edərək şeirlərini oxuyub. Şeirlərin Riçard Makkeyn, Xaqani Əliyev və Sevil Gültənin tərcümələrindəki variantlarını İradə Əhmədova səsləndirib. Sonra isə Səlim Babullaoğlu qonaqların müasir Azərbaycan ədəbiyyatı, poeziya mütaliəsi, kitab nəşri və öz yaradıcılığı ilə bağlı çoxsaylı suallarını cavablandırıb. Tədbirə dəvətli olan filologiya elmləri doktoru Cavanşir Yusifli də Səlim Babullaoğlunun yaradıcı məziyyətləri ilə bağlı qısa çıxış edib. Poeziya axşamında şair Fərid Hüseyn və Orxan Əzim də iştirak ediblər.

Görüşün sonunda qonaqların şərəfinə hazırlanmış ziyafət verilib. Səfir Erling Skjonsberg və xanımı Astrid Schnitzer Səlim Babullaoğluna bu axşamdan yadigar olaraq xatirə hədiyyəsi təqdim ediblər.

• Azərbaycan Dövlət Akademik Rus Dram Teatrının aprelin 16-dan 30-dək repertuarı
• Salam Sarvan yenidən əməliyyat olunacaq
• “Səslənən irsimiz” – Nazirliyin yeni layihəsi