Böyük Britaniyanın “Ladbrokes” bukmeker kontoru 2014-cü il Nobel Ədəbiyyat Mükafatına ən şanslı namizədlərə verilmiş əmsalları yeniləyib. Kulis.Az-ın “Ladbrokes” bukmeker kontorunun saytına istinadən verdiyi xəbərə görə, keniyalı yazıçı Nquqi va Thionqo 5.00 əmsalla (keniyalıya qoyuluş edən şəxslər o qalib gəldiyi təqdirdə hər dollara görə 5 dollar qazanacaq-red.) Nobelin dəyişməz favoriti yaponiyalı yazıçı Haruki Murakamini qabaqlayaraq birinci pilləyə yüksəlib.

İkinci sıraya enən Haruki Murakamiyə verilmiş 6.00 əmsalı isə dəyişməz qalıb.

Əlcəzairli Assia Djebar, belarus Svetlana Aleksijevitj və onluqdakı yeni yazıçı albaniyalı İsmail Kadare 11.00 əmsalla müvafiq olaraq 3, 4 və 5-ci yerləri bölüşürlər.

6 və 7-ci yerləri bölüşən amerikalı Joyce Karol Oates və norveçli Con Fosseyə verilmiş 13.00 əmsalı da dəyişməyib.

Siyahıdakı yeni adlardan biri də fransalı Patrik Modianodur ki, o da 15.00 əmsalla 8-ci sırada qərar tutub.

Suriyalı Adonis (Əli Əhməd Səid Əsbar) və çex Milan Kundera isə 17.00 əmsalla 9 və 10-cu yerdədirlər.

Onluqdan kənarda qalan İtaliyalı Umberto Eko (34.00), israilli Amos Oz (34.00), britaniyalı Salman Rüşdi (51.00) və amerikalı Bob Dilana (51.00) da verilmiş əmsallar dəyişməz olaraq qalıb.

İsveç Kral Akademiyasının 1901-ci ildən təqdim etdiyi Nobel Ədəbiyyat Mükafatı keçən il kanadalı yazıçı Elis Munroya verilib.

Mükafatın builki qalibinin adı oktyabrın əvvəllərində açıqlanacaq.

Qeyd edək ki, Nobel Ədəbiyyat Mükafatına pul qoyuluşları 5 oktyabrda başa çatır.

• "Mən kitab gördüm, bütün sözləri büllurdan..." - Günün şeiri
• Saxta tabutlar, pulsuz Həştərxan nefti və güllələnən ziyalılar - Nərimanov haqda filmin pərdəarxası
• Ac daşlar - Rabindranat Taqorun hekayəsi