Nizami rayonunun 328 saylı tam orta məktəbində Akademik Milli Dram Teatrının aktyorları xalq artisti Nurəddin Mehdixanlı və Anar Heybətovla görüş keçirilib. Kulis.azın məlumatına görə tanınmış aktyorlar məktəbin ədəbiyyat müəllimi, şairə Elnaz Eyvazın dəvəti ilə şagirdlərlə görüşüblər.

Tədbirdə məktəbin musiqi müəllimi Nailə Heydərovanın rəhbərliyi ilə hazırlanmış səhnəciklər, musiqi nömrələri nümayiş etdirilib. Şagirdlər Ü. Hacıbəylinin "Arşın mal alan" operettasından Vəli və Tellinin, Süleyman Ələsgərovun "Ulduz" kinofilmindən isə Məhəmməd və Züleyxa duetlərini, C.Məmmədquluzadənin "Ölülər" əsərinin son səhnəsi - İsgəndərin monoloqunu isə VII a sinfinin şagirdi Cümşüdov Səid nümayiş etdirdilər. Daha sonra VI sinif şagirdi Fateh Şıxəliyevin ifa etdiyi tar sədaları altında bədii qiraət müsabiqəsinin qalibi Büllurə Zamanova M. Müşfiqin "Oxu tar" şeirini söylədi.

Daha sonra məktəbin balaca qonağı olan, Tofiq Quliyev adına musiqi məktəbinin vokal və fortepiano siniflərində təhsil alan Eyvazlı Yeganə "O sole mio " mahnısını ifa etdi. Tədbir məktəblilərin aktyorlara ünvanladığı suallarla davam etdi.

Sonra tədbirin təşkilatçısı Elnaz Eyvaz dəvətlərini qəbul etdikləri üçün qonaqlara təşəkkürünü bildirib. O qeyd edib ki, bu görüşün şagirdlərin dünyagörüşündə, teatra, sənətə münasibətində önəmli yeri olacaq.

Sonda isə məktəbin direktoru Asif Nəbiyev çıxış edərək həm qonaqlara, həm də tədbiri hazırlayan müəllimlərə və şagirdlərə təşəkkürünü bildirdi.

• "Sən babanın yolunu gedə bilməzsən..." - Səma Muğanna
• Romantizmin üsyankar nəzəriyyəçisi - O, Avropanın gələcəyini necə təsəvvür edirdi?
• Monoton – Ayxan Ayvazın hekayəsi