Aprelin 1-3-də Çexiyanın paytaxtı Praqada çex və Azərbaycan animasiya filmlərinin sərgisi keçiriləcək.

Kulis.azın verdiyi xəbərə görə, "Animasiya filmlərinin sehri" adlanan sərginin təşkilatçısı hazırda Çexiyada yaşayan və kino məktəbində təhsil alan Rəşid Ağamalıyevdir.

Sərginin məqsədi Çexiya və Azərbaycan mədəniyyətləri arasında əlaqə yaratmaq, Azərbaycan animasiya filmlərini tanıtmaq, bu sahədə prosesi canlandırmaqdır.

Sərgi uşaqlar, valideynlər, həmçinin animasiya və təsviri incəsənətlə maraqlanan insanlar üçündür. Bu sərgidə böyüklərin və uşaqların çex və Azərbaycan animasiyası mövzusunda hazırladığı işlər, rəsmlər, kuklalar və kollajlar təqdim olunacaq. Bu işlər rəssam və müəllim Olqa Ağamalıyevanın rəhbəyi ilə həyata keçirilib.

Sərgi zamanı azərbaycan və çex cizgi filmləri, kukla teatrı tamaşaları göstəriləcək, peşəkarların mühazirələri və animasiya üzrə təlimlər keçiriləcək.

Sərgidə çex və Azərbaycan animasiya rejissorları iştirak edəcəklər. Rejissor Elçin Hami Axundov Azərbaycan animasiyası haqqında mühazirə oxuyacaq. Çex rejissorlar Jan Saska və Jan Bubenicek öz yaradıcılığdan söz açacaqlar və öz filmlərini təqdim edəcəklər.

Sərgi münasibətilə Azərbaycan animasiya kinosuna həsr olunan kitab nəşrə hazırlanır. Kitabda tanınmış kinoşünasların və qələm adamlarının – Aygün Aslanova, Aliyə Dadaşova, Aydın Kazımzadə, Sevinc Əzimova, Dadaş Məmmədov, Leyla Novruzinin məqalələri ilə yanaşı, xarici müəlliflərin Azərbaycan animasiya kinosu qəhrəmanlarına həsr olunmuş məqalələri toplanıb. Slovakiyalı kinoşünası Andrey Xovanets məqaləsində Firənqiz Qurbanovanın “Seans” filmini interpretə edir, çex rejissor-animator Karolina Çijkova isə müxtəlif illərə aid Cırtdan haqqında olan filmlərin misalında 70-80-ci illərin texniki işləmələr və ənənələrinin qorunub saxlanılmasının vacibliyini izah edir.

“Azərbaycan animasiyası” kitabın tərtibatçı Rəşid Ağamalıyev qeyd edir ki, elmi-populyar üslubda hazırlanmış bu kitab gələcəkdə də Azərbaycan animasiya kinosunun geniş tədqiqi üçün açar rolunu oynayacaq.

• Alman romantizminin vizual manifesti - "Duman dənizi üzərində səyyah"
• Türkiyə və İtaliya arasında əməkdaşlıq – Arxeoloji tapıntıların müzakirəsi
• Sumqayıt teatrı yeni mövsümü "Ölməz" tamaşası ilə açacaq