Ötən mövsümü bir sıra sənət uğurları ilə başa vuran Abdulla Şaiq adına Azərbaycan Dövlət Kukla Teatrı yeni mövsümdə də balaca tamaşaçılarına maraqlı sürprizlər vəd edir. Teatrın mətbuat xidmətindən AzərTAC-a bildirilib ki, teatrın balaca tamaşaçılarına hədiyyəsindən biri sentyabrın 18-i, Milli Musiqi Günündə nümayiş olunacaq marionet tamaşadır. Dahi bəstəkar Üzeyir Hacıbəylinin “O olmasın, bu olsun” musiqili komediyası əsasında hazırlanan tamaşada baş rolu teatrın aparıcı aktyoru, Əməkdar Artist Rəhman Rəhmanov ifa edəcək.

Teatrın kollektivi ilin sonunadək bir neçə tamaşa təqdim edəcək. Dövlət sifarişi ilə Abdulla Şaiqin “Tıq-tıq xanım” pyesi əsasında hazırlanacaq “Tıq-tıq və Taq-taqın nağılı” tamaşasına teatrın baş rejissoru Qurban Məsimov quruluş verəcək. Fərqli yozumda hazırlanan tamaşanın bəstəkarı Vüqar Camalzadə, rəssamı Rəvanə Yaqubovadır.

Bundan başqa, Conatan Sviftin məşhur “Qulliverin səyahəti” romanı əsasında da tamaşa hazırlanacaq. Səhnə işini Elşad Rəhimzadə ərsəyə gətirəcək.

Teatrın direktoru, “UNİMA” Azərbaycan Milli Mərkəzinin prezidenti Rəşad Əhmədzadə festivallara dəvətlər barədə məlumat verərək bildirib ki, yeni mövsüm üçün 5 beynəlxalq festivala dəvət alıblar. Bu dəvət marafonuna respublika daxilinə səfərlə start verilib. Şəkidə keçirilən I Beynəlxalq teatr festivalında Kukla Teatrı da tamaşa sovqatı ilə çıxış edəcək.

Bundan başqa, kollektiv oktyabr ayında Həştərxanda “Xəzər sahilləri” festivalında və Misirdə ənənəvi kukla teatrı festivalında iştirak edəcək.

• Selin Dion səhnələrə qayıdır
• Danimarka qədim mədəni irs nümunələrini Türkiyəyə qaytardı
• Güvəc Alyoşa - Lev Tolstoyun hekayəsi