Azərbaycan Milli Elmlər Akademiyasının (AMEA) Ədəbiyyat İnstitutunun təşkilatçılığı ilə xalq yazıçısı, professor Elçin Əfəndiyevin 70 illik yubileyi qeyd olunub.

Lent.az-ın məlumatına görə, tədbirdə çıxış edən Ədəbiyyat İnstitutunun direktor vəzifələrini icra edən Teymur Kərimi bildirib ki, Azərbaycan ədəbi-ictimai fikir tarixində Elçinin mühüm yeri var: “Elçin ədəbiyyata 60-ci illərdə gəlib. Bu nəsil bizim ədəbiyyatımıza yeni janrlar , nəfəs, qəhrəmanlar gətirdi. Onun hekayələri, romanları, kino-povestləri, dramaturgiyası bizim ədəbiyyatımızı dünya ədəbiyyatına tanıdıb. Bu gün bizim ədəbi-ictimai fikrimizdə, tənqidimizdə, teatrımızda Elçinin xətti ilə böyük məktəblər var. Artıq Azərbaycanda Cəfər Cabbarlı, Hüseyn Cavid, Səməd Vurğun, İlyas Əfəndiyev teatrı olduğu kimi, Elçin teatrı da formalaşıb”.

AMEA-nın vitse-prezidenti İsa Həbibbəyli də Elçinə yaradıcılığında və şəxsi həyatında uğurlar arzu edib: “Görkəmli yazıçı, tənqidçi, ictimai xadim kimi qəbul edilən Elçin Əfəndiyevin yaradıcılığı onun fəaliyyətinin onurğa sütunudur”.

Elçin Əfəndiyev isə çıxış edərək Ədəbiyyat İnstitutunun təşkilatçılığı ilə keçirilən tədbirin çox xoş olduğunu deyib: “Mənim həyatımın, gənclik çağlarımın ilk on ili məhz bu institutla bağlıdır. Mən burada aspirant, Nəzəriyyə şöbəsində kiçik elmi işçi, böyük elmi işçi olmuşam. Azərbaycan ədəbiyyatşünaslığının inkişafında, onun nəzəri bazasının möhkəmlənməsində, genişlənməsində, ədəbi tənqidinin inkişafında bu institut böyük rol oynayıb. Unudulmaz Məmməd Arif, Məmmədcəfər Cəfərov, Məmmədhüseyn Təhmasib, Məsud Əlioğlu, Bəkir Nəbiyev məhz burada işləyib. Mən bu saat sizin qarşınızda onların ruhunu yad edirəm. Onların qoyduğu ənənə bu gün də davam edir”.

• "Meksikanın Çarli Çaplini" adlandırılan Kantinflasın 3 əsas rolu
• Prezident İlham Əliyevin sosial media hesablarında 1 Avqust - Azərbaycan Əlifbası və Azərbaycan Dili Günü münasibətilə paylaşım edildi
• "Məni endirməyin yerə, amandır..." - Bəxtiyar Vahabzadənin şeirləri