Hər gün saytlardan pis xəbərlər oxuyuruq. İnsanlar bir-birini bıçaqlayır, öldürür, bir-birlərindən oğurlayır, qarət edir, aldadır, qəza törədir, müharibə edir, baş kəsir... Bəs dünyada yaxşı heç nə baş vermir? Əlbəttə baş verir. Sadəcə bu yaxşı nümunələri tapıb üzə çıxarmaq, onları paylaşmaq lazımdır. İnsanlığın ölmədiyini sübut etmək üçün.

Kulis.az xeyirxahlıq nümunələrini və pozitiv nüanslarla dolu olan hadisələri təqdim edir.

Müştərinin əvəzinə pul ödəyən kassir

Yeni Zelandiyada supermarketlərin birində yaşlı qadın alış-veriş etdikdən sonra kassada ödənişlə bağlı problem yaranır. Terminal heç cür onun kartını qəbul etmirmiş. Ödəniş edə bilmədiyinə, üstəgəl onun probleminə görə yaranmış növbə qadını narahat etməyə başlayır. Bu zaman supermarketin kassiri Rebekka Maklean öz kartını çıxarır və qadının yerinə ödəniş edir. Kassir bu yaxşılığı haqda heç kimə danışmaq fikrində deyilmiş əslində. Amma yerli qəzetin redaktoru həmin vaxt hadisə yerində olduğundan bu haqda yazır. İlk baxışdan adi bir hadisə kimi gəlir adama. Amma hansı birimiz həmin kassir qız kimi edərdik?

Pişiklər uşaqların köməyinə çatır

Təkcə insanların deyil, heyvanların da kömək etmək hissləri varmış. Bir müddət öncə uşağa hücum edən iti zərərsizləşdirən pişiyi xatırlayın. Buna oxşar hadisə isə Böyük Britaniyada yaşanıb. Beş yaşlı İtan Fenton öz balaca qardaşı ilə həyətdə oynayırmış. Yaşca böyük olan 2-3 oğlan onlara yaxınlaşıb və söz atmağa başlayıb. Oğlanlardan biri uşağı itələyib. Bu zaman pişik maşından düşüb, qaça-qaça oğlanların üstünə hücum çəkib. Qorxan xuliqanlar qaçmağa başlayıblar. “Smadj” ləqəbli pişik “İlin pişiyi” adına layiq görülüb.

Zəif xidmətə görə çox “çay pulu”

Ötən ay Stiven və Makenzi adlı cütlük restorana şam yeməyinə gedirlər. Nədənsə, restoranda çox zəif xidmətlə rastlaşırlar. Səbəb isə restoranda ofisiant çatışmazlığı imiş. Bütün masalar dolu imiş və bir oğlan bütün masalara qulluq edirmiş. Buna görə də sifarişlər gecikirmiş. Cütlük belə qərara gəlir ki, bu gün ofisiant hamıya pis qulluq etdiyinə görə qazancı da az olacaq. Məhz buna görə onlar görünməmiş miqdarda “çay pulu” verirlər. 66 dollar hesab gəlir, onlar isə əlavə olaraq xidmətçiyə 100 dollar verirlər. Bu hadisəni özlərinin Facebook hesabında yazan cütlük bildirib ki, onlar da vaxtilə ofisiant işləyiblər və həmin oğlanı çox yaxşı başa düşürlər.

Müharibə və insanlıq haqqında

Suriya. Bu ölkə haqqında bu gün pozitiv nəsə yazmaq çox çətindir. Amma hər yerdə müsbət bir şey tapmaq olar. Suriyanın Masaken-Xanano rayonunun sakinləri artilleriya atəşinə dözməyərək bölgəni tərk ediblər. Şəhərin pişikləri isə kimsəsiz qalıblar. Sürücü Alaa isə pişikləri yemləyir. Mağazadan ət alır, evdə qalan yeməklərdən gətirib bu pişiklərə yedizdirir. Müharibə hələ insanlığın tam olaraq ölməsi demək deyilmiş.

Dünyanın ən yaxşı nənəsi

Bu möhtəşəm qadının adı Lilian Veberdi. Onun 99 yaşı var. Bu yaşında o bekar dayanmır. Paltar toxuyur. Amma satmaq üçün yox. Nəvələri üçün də yox. Afrikada ehtiyac içində yaşayan uşaqlar üçün tikir bu nənə. 800-dən çox paltar tikib. Məqsədi bu rəqəmi minə çatdırmaqdır. Nənə hər bir paltarın fərqli olmasına çalışır. Qoy, balaca mələklər öz paltarları ilə qürurlansınlar.

Üşüyərkən, sadəcə bir-birinizə yaxınlaşın!

• Məşhur rəssam vəfat etdi
• Çarəsizliyin ifadəsi, fövqəltəbii güc və gizli agent – Helli Berrinin 3 yaddaqalanrolu
• "Harri Potter" serialında nələr olacaq? - Operator açıqladı