Azərbaycanda dil polisinin yaradılması təklif olunur. Milli Məclisin deputatı, xalq şairi Sabir Rüstəmxanlı Lent.az-a bildirib ki, belə bir qurumun yaradılması vacibdir. Millət vəkilinin sözlərinə görə, dünyada belə bir təcrübə var. S. Rüstəmxanlı həmçinin dil gömrüyünün olmasını da vacib hesab edir. Xalq şairinin fikrincə, dilə daxil olan sözlər süzgəcdən keçirilməli və yararsız sözlərin dilə daxil olmasının qarşısı alınmalıdır. “Bununla bağlı gələn il Milli Məclisə təklifin verilməsi gözlənilir. Amma bu məsələ dövlət başçısı ilə razılaşdırılmalıdır”.

Millət vəkili onu da vurğulayıb ki, bu məsələ hətta Milli Məclisdə də səsləndirilib. S. Rüstəmxanlı küçə reklamı və elanları ilə bağlı narazılığını da gizlətməyib. Millət vəkli vurğulayıb ki, bu sahədə hələ də problem qalmaqdadır.

Bununla bağlı Milli Məclisin Mədəniyyət Komitəsinin sədri, dilçi-alim Nizami Cəfərovun da mövqeyini öyrəndik. O bildirib ki, dil polisinin yaradılmasına ehtiyac yoxdur. “Bu cür məsələlər humanitar sahələrdə özünü ümumiyyətlə doğrutmur”.

Millət vəkili bildirib ki, müvafiq qurumlar dil məsələsində həssas olmalıdır: “İcra Hakimiyyəti başçılarının humanitar məsələlər üzrə müavinləri şəhərin dil mənzərəsinə də nəzarət etməlidirlər. Bu baxımdan hesab edirəm ki, ayrıca dil polisinin yaradılmasına ehtiyac yoxdur.

Əgər elan və reklamlarda başqa dillərə daha çox üstünlük verilirsə, apteklərdə satılan Azərbaycan dilində dərman içliyi yoxdursa, bütün bunlara müvafiq icra hakimiyyətləri orqanları cavabdehdir".

• Qadın nələri bilməlidir? - Adrienna Riç
• Yaşar Qarayevin 90 illiyi ilə əlaqədar elektron məlumat bazası hazırlandı
• Məşhur müğənni vəfat etdi