Azərbaycan Dövlət Musiqili Teatrında yazıçı-dramaturq Əli Səmədlinin “Toya bir gün qalmış” komediyasının məşqlərinə başlanılıb. Bu barədə kulis.az-a teatrın mətbuat xidmətindən xəbər veriblər. Tamaşanın quruluşçu-rejissoru, Əməkdar İncəsənət Xadimi Əsgər Əsgərov tamaşa haqqında bunları deyib: “Komediyanın süjetinə görə, qızının toyuna bir gün qalmış nazir evində oturduğu yerdəcə ölür. Arvadı qərarə gəlir ki, bunu hamıdan gizlətsinlər. Düşünür ki, ərinin ölümü toyun təxirə salınması ilə yanaşı onların bir sıra maraqlarına da zərbə vura bilər. Beləliklə, maddi maraqlar mənəvi tərəfi üstələyir. Evdə ölü ola-ola hamı çalıb oynayır. Sonda məlum olur ki, əslində kişi ölməyib, sadəcə kliniki ölüm keçirib. Ən maraqlı hadisələr isə o ayıldıqdan sonra baş verir. Nə baş verdiyini bilmək istəyənləri tamaşaya baxmağa dəvət edirik.”

Qeyd edək ki, tamaşanın quruluşçu-rəssamı Nabat Salamovadır. Premyera dekabrın ortalarına nəzərdə tutulur. Tamaşada xor və balet truppasının artistləri ilə yanaşı əsas obrazları Xalq artisti Afaq Bəşirqızı, Əməkdar artist Ələkbər Əliyev, aktyorlar Əliməmməd Novruzov, Gülcahan Salamova, Möylə Mirzəliyev, Gültac və Hüseyn Əlililər və başqaları ifa edirlər.

• "Mənə dedilər ki, onun yasına getmə" - Elşad Miri Hacı Şahin haqqında
• İranda əsərlərinin çapına qadağa qoyulan Güney azərbaycanlı şair - Araşdırma
• Romanlarımız belə başlayır və belə bitir - Siyahı