Kulis.az Ulucay Akifin "Rasim Balayev niyə sədr seçilib?" adlı yeni yazısını təqdim edir.
Dünən iki kino ittifaqımız "bir"ləşdi.
Açığı, heç birinin fəaliyyətindən xüsusi xəbərdarlığım olmayıb. Başım çıxmır bu məsələlərdən.
Mən, sadəcə, çəkilən kinolara baxmışam, film festivallarına dəvət ediblər, getmişəm. Fikrimi soruşublar, fikrimi demişəm. Fikrimi soruşmayıblar, dinməz durmuşam. Kino ilə münasibətim bu müstəvidədir.
"Nə kimin kurasiyasındadır?"
"Hansına ildə nə qədər pul ayrılır?"
"Hansı ittifaq nə qədər yeyinti eləyir?"
"Kim kimin adamıdır?"
"Hansı rejissorun sözü hansı aktyorun boğazından keçmir?"
"Hansı aktrisa bütün ittifaqı barmağında oynadır?"
Bu şeylərdən xəbərdar deyiləm. Mənə maraqlı da deyil belə söhbətlər.
Mənə maraqlı olan ortaya qoyulan işdir.
Nə çəkirlər, nə göstərirlər bizə?
Hansı aktrisanın hansı rejissorun otağından gizlincə çıxdığı mənə maraqlı deyil. Lap heç çıxmasın.
Mənə maraqlı gələn başqa məsələdir.
Dünən Azərbaycan Kinematoqrafçılar İttifaqına Xalq artisti Rasim Balayev sədr seçildi.
Bax, bu mənə maraqlıdır.
Rasim Balayevin seçilməsi yox haaa!
Seçilib seçilib də.
Mənə maraqlı olan odur ki, niyə bu kino cameəsindən bir adam da çıxıb soruşmur ki:
"Ay qardaşlar, ay bacılar, axı kino ittifaqının sədri niyə aktyor olmalıdır?".
Bir adam da bu sualı vermir. Nə özünə, nə kino cameəsinə, nə də camaata.
Elə bil, belə də olmalıymış.
Sədrliyə iki namizəd var idi, ikisi də aktyor: Rasim Balayev və Şəfiqə Məmmədova.
Bir adam da qalxıb demədi ki,
"Ay adamlar, axı bir aktyor niyə ittifaqın sədri olmalıdır? Gəlin bir yaxşı rejissorumuzu özümüzə sədr seçək".
Yoxsa bu kino cameəsindəki adamlar elə bilirlər ki, kinonu ərsəyə gətirən aktyorlardır?
Bu qədər naşıdırlar?
Əgər elədilərsə, burdan üzümü onlara tutub başa düşəcəkləri dildə primitiv həqiqətləri deməliyəm.
Onlar bilməlidir ki, kino ittifaqının sədri rejissor olmalıdır.
Bu, birmənalı şəkildə belədir.
Kino aktyorun yox, rejissorun işidir.
Aktyor "tut priçom"?
Vı izdevaetes ştoli?!
Nu jeeee, tak nelzya moi rodnıe!
Dünyanın hər yerində kino sahəsini idarə edənlər rejissorlar və prodüserlərdi.
Bizdə isə artıq bütün enerji və potensialını xərcləmiş aktyoru keçmiş fəaliyyətinə görə ittifaqa sədr seçirlər.
Vı s uma soşli?!
Rasim Balayev kino adına nə edə bilər axı? Da?
Uzağı filmə çəkilə bilər, i fso.
Deyir ki "Rasim Balayev buna layiq idi".
Ay qardaş, Rasim Balayevi qiymətləndirmək üçün ona hansısa çox vacib bir vəzifəni vermək lazımdır?
Bu nə məntiqdir axı?
O vəzifə kiminsə könlünün şad olması üçün nəzərdə tutulub, ya kino sahəsinin inkişafı üçün?
Əgər birincidirsə, deyin, bilək. Biz də sevinək ki, əsas odur, Rasim Balayevin könlü şad oldu, onu sevindirdik.
Axı elə deyil.
Bu vəzifələr kiminsə könlünün xoş olması üçün yaradılmayıb.
Mən kino istəyirəm. Dünyaya çıxara biləcəyimiz kinolar istəyirəm.
Dünyaya çıxara bilmirik?
Cəhənnəm!
Heç olmasa, özümüz baxanda könlümüzün şad olacağı filmlərimiz olsun istəyirik.
Rejissor məktəbimiz olsun istəyirik.
Ssenarist məktəbimiz olsun istəyirik.
Aktyor məktəbimiz olsun istəyirik.
Yəni tək arzumuz Rasim Balayevin könlünü şad etmək deyil, başqa arzularımız da var.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
