Kulis.az "Sözün Güneyi" layihəsindən Türkan Urmulunun yeni şeirlərini təqdim edir.
Türkan Urmulu 1985-cı ildə Azərbaycanın ən qədim mədəniyyət ocaqlarının biri olan Urmuda anadan olub. 2005-ci ildə Urmuda “Yaz” nəşriyyatı tərəfindən “Gördüm” adlı ilk şeirlər kitabı nəşr edilib. Hüquq üzrə bakalavr təhsilini Urmuda tamamladıqdan sonra Türkiyəyə gedib və Ankara Universitetində beynəlxalq özəl hüquq üzrə magistratura pilləsində təhsil alıb.
2011-ci ildə “Özgə Toz” adlı ikinci şeir kitabı Bakıda “Qanun” nəşriyyatında nəşr edilib. Türkan şeir, hekayə və feminizmə aid əsərlərin tərcüməsi ilə də məşğuldur. Bakıda yayımlanan Maya Angelounun “Fenomenal qadın” adlı şeirlər kitabının və Bell Kooksun “Feminizm hər kəs üçündür” adlı kitabın tərcüməçisidir.
***
Niyə hamı bir yana, sən bir yana?
Sən
niyə bu qədər gərəklisən?!
Bütün eşitlik qaydalarını pozan,
hər an, hər yerdə hazır
hüzurun...
O hər gün məni
aynaların ağ saçlarına
astaca gülümsədən
ağır əngin
hü zu run...
Bir də ürəyimdən aya qədər yüksələn ahəngin...
Biz sistematik sevgilərin peşəkar rəqqasələri,
əlbəttə ki, mən hələ heç kimsəyə
səninlə ayın ürəyində rəqs etdiyimizi deməmişəm.
Təki əksilməsin hüzurun
vaxtında çiçəklənən ən xoşbəxt orkidələr kimi
bu sevgi heç solmasın.
Əlbəttə ki, hər şey tam “qaydasında” qalsın.
***
Rəsmi kimliyini daşımayan vətənin vətəndaşı
rəsmi xəritələrin sömürdüyü coğrafiyanın rəsmi sürgünlərindən biri
adımı yanlış səsləyənlərin babalı
onu rəsmən yanlış yazdıranların boynuna.
Adımı səsləməyənlərin babalı
rəsmən yazdırmağa belə qoymayanların boynuna.
İndi qoy bütün rəsmi çizgilərin ürəyinə cızıq salım.
Qoy indi mən səni görməyə gəlim.
Zümrüd quşu – qanadı oxşayan əllərinə toxunmağa
sevgili…
Mənə qanad lələklərindən qələm gətirməyi unutma,
qənşər şeirlərimə gəbə,
qənşər duyğularım...
sevgili,
qoy adımı adının yanında yazım.
***
İnlər damlalar,
ağıt kimi yağırdı yağış o gecə,
şəhərin bütün işıqları gecikmiş qaranlığa,
fastfoodların belə işləmədiyi saatlar…
Ora birinci dünyanın
ən ünlü xiyabanlarından biri,
ora hər gecə polislərin unutduğu
omba-bacaq qadın organlarının sərgisi...
Tanrının məsləhətindən umudu kəsmiş
günahlarımızın mələk qurbanları,
üsyan – onların göylərə açılmış şəmsiyyələriydi...
şeir yox,
o gecə ancaq ağıt yazıldı...
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
