Özüm də Allahın möcüzəsi – Uşaq şeirləri

Özüm də Allahın möcüzəsi – Uşaq şeirləri
24 may 2022
# 15:40

Kulis.az Mina Rəşidin yeni uşaq şeirlərini təqdim edir.

Nar

Cənnət meyvəsiyəm mən.

Başımda tacım da var.

Kim dost olsa mənimlə

Mikrobdan uzaq olar.

Xəstəliklərə qarşı

Mən bir qalxan kimiyəm.

Öskürəyin düşməni,

Zökəmin qənimiyəm!

Allahın möcüzəsi –

Bir dənəmdə yüz dənə.

Mən düşmənəm ürəkdə

Paxıllığa və kinə.

Ürək məlhəmi olub

Könüllərə nuram mən.

Uşaqlar, tanıdınız?

Mən naram ey, naram mən!

Üzüm

Salxım-salxım yetişib

Dənələrim ağ, qara.

Allahın hökmü ilə

Düzüldüm sıra-sıra.

Dadı-tamı başqadı

Mənimlə xörəklərin.

Mən dostuyam yaddaşın,

Saçların, böyrəklərin...

Zəifləyən gözlərin

Qulluğunda mən hazır.

İşdir, qızdırman olsa

Məni köməyə çağır!

Əncir

Cənnət meyvəsiyəm mən

Heç bilirsiniz kiməm?

Allahın möcüzəsi

Mən əncirəm, əncirəm.

Sümüklərin, dişlərin

Mənimlə möhkəm olar.

Ağıllı, həm güclüdür

Məni sevən uşaqlar.

Gör necə yupyumşaq,

Dadlıyam, şirəliyəm.

Qaraciyər, böyrəyə,

Ürəyə xeyirliyəm.

Öskürəyi kəsirəm,

Qızdırmanı salıram.

Mən qurumuş halımda

Daha güclü oluram!

Göyqurşağı

Al-əlvan rənglərimlə

Göyün yaraşığıyam.

Uşaqlar sevir məni

Mən bir göyqurşağıyam.

Hərdən görünürəm mən

Yeddi rəngli donumda.

Günəş şəfəqlərilə

Yağış görüşən anda.

De, hansı rəssam çəkər?

Heyrətlə baxır hamı.

Allahın əsəriyəm

Məndən gözəl de, hanı?

Arı

Sarı gülə bənzərəm,

Lalə kimi xalım var.

Min bir dərdin dərmanı

Dadlı, şirin balım var.

Gəzərəm, dolanaram

Bağçaları, bağları.

Aşaram qanadımla

Uca-uca dağları.

Ətirli çiçəklərin

Şirəsini çəkərəm.

Bir məlhəm hazırlayıb

Pətəyimə tökərəm.

Mühəndisəm, aşpazam...

Həmişə çalışaram.

Mən öz düşmənlərimlə

İynəmlə savaşaram.

Özümü öyməyim çox

Varmı bunun niyəsi?

Özüm də, pətəyim də,

Allahın möcüzəsi!

# 450 dəfə oxunub

Oxşar xəbərlər

# # #