Kulis.az Ulucayın Akifin “Bəhram Bağırzadə kimdir?” adlı yazısını təqdim edir.

Baxıram, Bəhram Bağırzadənin "rayonlu-bakılı" söhbəti adamları xeyli narahat eləyib. Yenə qızğın şəkildə müzakirə edirlər, səhifələrin kommentlərində-filan qırğındı.

Məsələ bilirsiniz nədir?

Bəhram Bağırzadənin heç bir fikri məni narahat eləyə bilməz. Çünki mənə görə, deyilən fikir qədər əhəmiyyətli olan bir başqa məqam da var: həmin fikri kimin dediyi.

Deyə bilərsiniz ki, bəs niyə bu yazını yazırsan?

Bu yazını ona görə yazıram ki, eyni məqam sizin üçün də keçərli olsun. Fikri kimin dediyinə də baxın. Bəhram Bağırzadədi də. Desin. Bəhram Bağırzadənin dediyi sözün nə qədər əhəmiyyəti ola bilər? Heç özümə əziyyət verib nə dediyi ilə maraqlanmadım da. Həmişə elədiyi "kəndçi-şəhərli" söhbətidir də.

Kimdir Bəhram Bağırzadə? Bunu ironiya ilə soruşmuram. Ciddi soruşuram. Bəhram Bağırzadə kimdir?

Məsələn, birdən yolda sizə mikrofon uzadıb “Bəhram Bağırzadə kimdir?” sualını versələr, nə cavab verəcəksiniz?

Fikirləşin.

Deyəsən, siz də qərarsız qaldınız.

Başa düşürəm. Çünki Bəhram Bağırzadənin tam olaraq kim, nəçi olduğunu heç birimiz bilmirik. Aktyordur? Aktyor demək olmur. Yazıçıdır? Yox. Şoumendir? O nədir? Aparıcıdır? Qətiyyən.

Hər tamaşada, xırda-para filmdə oynayan adamlara aktyor demək olmaz axı. Nəhəng bir sənətdi aktyorluq.

"Planeta parni iz Baku"nun 3-5 tamaşasında oynamış, bir-iki filmdə epizodik rollarda görünən adama rahatlıqla aktyor deyə bilirsiniz? Mən yox.

Hə, onu deyirdim axı. Mənim üçün ən az deyilən fikir qədər əhəmiyyətli olan başqa bir məqam da fikri səsləndirənin kimliyidir? Hər adamın dediyi mənim üçün vacib olsaydı, ta nə oldu?

Deyə bilərsiniz, Bəhram Bağırzadə məşhurdur, populyardır, ona görə də fikri belə ajiotaj yaradır. Axı məşhurluq, populyarlıq bir adamın fikrini ciddiyə almaq üçün nə dərəcədə əhəmiyyətli faktor ola bilər?

Məşhurluğa qalsa, Bayram Nurlu da məşhurdur, meyxanaçı Baləli də, tiktokçu Məhəmməd Dəniz də, nə bilim, filankəs də. İndi bu adamlar necəsə məşhurlaşıb deyə onların fikrini ciddiyə almalıyam?

Bu nə absurd yanaşmadır?

Bəhram Bağırzadənin işi, funksiyası məni güldürməkdir. Bacarırsa, güldürsün, yoxsa ta onun hansısa fikrini ciddiyə alım, əsəbiləşim, qəzəblənim. Yox bir.

Özü də Bəhram özü heç bakılı deyil, İsmayıllıdandı, Allah haqqı.

• Ayaqları tutulan, qürbətdən qayıdan Məmməd İsmayılın yubileyindən reportaj
• Marka kolleksiyası - Karel Çapekin hekayəsi
• “Səttar Bəhlulzadə - təbiətin ecazkar nağılı” adlı sərgi açılacaq