Kulis.az tanınmış şair Sevinc Elsevərin hamilə vəziyyətdə öldürülən Leyla Bəkirovaya həsr etdiyi “Əliyalın qadınlar” şeirini təqdim edir.

oxuduğu cinayət xəbərindəki
qısqanclıq zəminində
boğazı kəsilərək öldürülən qadının
bir vaxtlar uğrunda ölə biləcək qədər sevdiyi
o qız olduğunu bilmədi
bacısı olsa da anlamayacaqdı
qızı olsa da
adlar şərti verilmişdi
öldürülən qadının üzü örtülmüşdü
qan hopmuş mələfəylə
baxdığı fotoda

endirdi xəbəri aşağı
belə xəbərlərə alışıqdı
hər gün təzəsi çıxırdı manşetlərə...
bir az siyasi xəbərlərə baxdı
bir az mədəniyyət xəbərinə
yeyib-içib keçdi yerinə
səhər kefikök qalxdı
gördüyü yuxunu xatırlayıb gülümsədi
doymamışdı o yuxudan
o yuxunun əhvalıyla şirin-şirin əsnədi...

səhər süfrəsində də telefonu qoymadı əlindən
baxdı yeni günün manşetinə
başqa bir qadın öldürülmüşdü yenə
xəbəri açıb baxmadı belə
cəbhədən xəbər vardı
düşmənlər gənc əsgəri vurmuşdı...
qanı coşdu qəzəblə, nifrətlə, kinlə
cavan, sütül oğullar qurban gedirdi düşmən gülləsiylə
düşünmədi bir kərə
bəs qadınları kim öldürür, qadınları?
hansı cəbhədə
nəyin uğrunda
qurban gedir onlar?

qüvvələri qeyri-bərabər döyüşlərdə
silahsız, əliyalın
sülhsevər, rəhmli qadınlar
əsir alınırlar
alınıb-satılırlar
təslim olmaq üçün
ağ bayraq
ya əllərini qaldırsalar da
ən qəddar üsullarla
amansızlıqla cəzalanırlar
rəhm etmirlər onlara müharibə
meydanlarındakı kimi.

• "Bütün bunlar ya mənim başıma gəlib, ya da nə vaxtsa gələcək..." - Hekayə müzakirəsi
• Qəzada həlak olan, ölümündən sonra gizli kitabçası tapılan Xalq artisti
• "Quran"ı əzbər bilən Qara Qarayev kimdir?