Kulis.az dünyaca məşhur İran rejissoru Abbas Kiyarostaminin minimalist şeirlərini təqdim edir.

***

Alma ağacdan
düşdü
və mən
sənin cazibən haqqında düşündüm

***

Qapının yırtığından
həm sazaq dolur içəri
həm nur

***

Heyf
yaxşı ev sahibi ola bilmədim
kirpiyimə qonan
ilk qar dənəciyinə

***

Enməyi təcrübə elədim
qanadlanıb uçmaq üçün.

***

İllərdir saman çöpütək
illər arasında
sərgərdan olmuşam

***

Gecənin, gündüzün
sonuna olduğu qədər
inamım yoxdu heç bir şeyə.

***

Uşaq beşiyində
xəbərsizdir öz yatağının hüdudlarından
üçün dördə olan bir otağın içində

***

Uşaq-nənə oyunlarında
uduzan həmişə
ağbirçəklərdir.

***

İşıldaböcək
öz işığını səxavətlə paylaşır
Aysız gecədə

***

Çəltikçilərin oxuduğu nəğmələr
bəziləri hüznlüdür, bəziləri sevincli
amma hər ikisinin ahəngləri eynidir.

***

Məbəddə
min şey haqqında düşündüm
çölə çıxanda birini belə xatırlamadım

***

Yağış yağır dənizə
tarlalar susuz

***

Alabalıqlar bilmir
bu çayın məqsədini
üzürlər axınla aşağı
duzlu sulara qədər

***

Şərqdən gələn fırtına
sürət verir
qarğaların
Qərbə doğru uçuşuna.

***

Bütün ilin məhsulu
bircə günə yığılır
yorğun kəndlinin
yorğun ulağının belinə.

***

Heç kəs bilmir
çeşmənin qəlbindən qopan
kiçik arxın
dənizə qovuşmaq niyyətini

***

Qatar inildəyir
və dayanır
Uyumuş bir kəpənək
dəmir yolu üzərində

***

Nə qədər düşünsəm də anlamıram
kasıbın əlindəki qabarların səbəbini
Nə qədər düşünsəm də anlamıram
həqiqətin bu qədər acılığını
Nə qədər düşünsəm də anlamıram
kəhkəşanın bu qədər böyük olduğunu.

***

Ay qırılır
pəncərənin çərçivəsində.

***

Bir neçə məktəbli
qulaqlarını dayamışdı
tərk edilmiş dəmir yolu relslərinə

***

Zəlzələ viran qoydu
qarışqaların taxıl anbarını

***

Kölgəm mənə yoldaş
Aylı gecələrdə

***

Yerə düşür açar
səssizcə
çəltikçi qadının boynundan yerə
qaynayır qəhvədan
ocağın üstündə.

***

Növbəti rüzgar
hansı yarpaq sıradadır düşmək üçün

Tərcümə Ariz Tarverdiyevindir

• Dünyanın ən qədim dastanları
• Məşhur reperin həbs müddəti uzadıldı
• Kurt Şnayderin psixopat təsnifatı - Siyahıda kimlər var?