Bu gün Xalq yazıçısı Çingiz Abdullayevin doğum günüdür. Kulis.az bu münasibətlə Xalq yazıçısı ilə qısa müsahibəni təqdim edir.

- Çingiz müəllim, doğum gününüzü təbrik edirik! Ad gününüzü qeyd edəcəksinizmi?

- Çox təşəkkür edirəm. Doğum günlərimi xüsusi qeyd etməyi sevsəm də, bu dəfə möcud vəziyyətlə bağlı geniş şəkildə keçirtməyəcəm. Ancaq ailə üzvlərimlə qeyd edəcəm yeni yaşımı.

- İlk təbriki kimdən aldınız?

- Təbii olaraq, ilk təbrik edən həyat yoldaşım olub. Səhər saat 08:00-dan telefonlarım susmur. Dostlar, tanışlar, həmkarlar, bizi sevənlərin hamısı təbrik edirlər. Yorğunluqdan səsim də tutulub. Nə qədər insanlardan təbrik eşitmişəm. Bunlar təbii ki, məni sevindirir.

- Karantin günləri yaradıcı insanlar üçün bir fürsətdir. Siz bu fürsətdən necə istifadə edirsiniz?

- Yazıçı belə günlərdə nə edə bilər? Oturub işləyirəm. Kitablar yazıram. Ssenari üzərində işləyirəm. Mən fikirləşirdim ki, yazıçı bu günlərdə bir qədər azad olar. Amma mən azad ola bilmədim. Gün ərzində nə qədər zəng gəlir. Onları cavablandırıram. Karantin günlərinin insanlar üçün çətinliyini başa düşürəm. Yaradıcı insanlara bu günləri atlatmaq daha rahatdı. Çünki rəssamlar, yazıçılar, heykəltəraşlar oturub nələrsə düşünürlər yaradırlar. Amma başqa insanlar üçün çətindir. Ona görə də mən bu günlərdə hər kəsi səbrli olmağa dəvət edirəm.

- Çingiz müəllim, dünyaca məşhur “Taxt oyunları” serialının ssenaristi yazıçı Corc. R.R. Martin koronovirus pandemiyası haqqında kitab yazmağa başlayıb. Siz necə bu barədə əsər yazmaq haqqında düşünürsünüzmü?

- Bilirsiniz, bu haqda tez-bazar kitab yazmaq olmaz. Axı bu jurnal, qəzet deyil ki, yaranan problemdən xəbər yazaq. Ciddi yazıçılar belə məqamlarda o saat qələmə sarılıb bu barədə roman yazmırlar. Bunun üçün müəyyən bir zaman keçməlidir. Əsər yazacağıqsa, uzun müddət bu barədə düşünməliyik. Bilirsiniz ki, Mədəniyyət Nazirliyi Yazıçılar Birliyi ilə birgə koronavirus mövzusunda hekayə müsabiqəsinə start verib. Əsasən insanların koronavirusdan sonrakı dövrü necə yaşayacaqlarından bəhs olunan hekayələr olacaq.

- Sizə can sağlığı, uğur arzulayırıq.

- Təşəkkür edirəm. Diqqətinizə görə minnətdaram.

• Klassik Şərq poetikası ilə modern rəngkarlığın təfsiri - Mikayıl Abdullayevin "Füzuli" əsəri
• “Simurq” kitabxanası ilə bağlı müəyyən çaşqınlıq yaranıb" - Nazirlikdən açıqlama
• “Kapellhaus Garden Hall”ın təqdimatında klassik musiqi axşamı