Elif Şafakın kitabı Amerikada nəşr olunacaq

Sənət

Ana səhifə
Sənət

Elif Şafakın kitabı Amerikada nəşr olunacaq

6 may 2011

12:12

Türk yazıçı Elif Şafakın “Qara Süd” kitabı “Viking/Penguin” tərəfindən ingilis dilində çap olunub.

Bu həftə Amerikada satışa çıxarılacaq avtobioqrafik romanı yazıçı 2007-ci ildə yazıb. Bundan bir il əvvəl ana olan Şafak romanda doğum sonrası yaşadığı depressiyanı altı xəyali qadın obrazın dilindən anladır.

Yazıçı Nyu-Yorkda qatıldığı PEN festivalında daha iki hadisə ilə yadda qalıb.

Şafak ingilis yazıçı Salman Ruşdi və amerikalı yazıçı Conatan Franzen ilə birlikdə Moth Teatrında çıxış edib. Beş yüzə yaxın insanın izləməyə gəldiyi çıxışda Şafak “Yazıçı dilemmaları” mövzusu üzərində danışıb.

Tanınmış yazar çıxışında başına gələn gülməli hadisələri, İstanbulun tarixi və gündəlik həyatından düşündürücü məqamları bölüşüb.

Virginiya, Harvard, Boston Universitetlərində də çıxışlar edən yazıçı tələbələrin suallarına cavab verib.

Yazıçı tələbələrin suallarına cavab verərkən İstanbulu da unutmayıb. O, “Ən çox sevdiyiniz şəhər hansıdır?” sualına: “Əlbəttə, İstanbul, dalğalı, ehtiraslı, çətin bir sevgili kimi” deyə cavablayıb. Digər tələbənin “Sizcə, ən yaxşı oxucular kimlərdir?” sualına isə: “Romanları, kitabları ürəklə oxuyanlar, ürəkdən oxuyanlar” cavabını verib.

Günel Əsgərzadə