Kino gününü belə qeyd etdilər FOTOLAR

Sənət

Ana səhifə
Sənət

Kino gününü belə qeyd etdilər FOTOLAR

3 avqust 2012

10:34

Ötən gün Nizami Kino Mərkəzində Milli Kino Günü münasibətilə təntənəli tədbir keçirilib. APA-nın məlumatına görə, tədbirin açılış mərasimində çıxış edən mədəniyyət və turizm naziri Əbülfəs Qarayev Azərbaycanda Kino Gününün qeyd olunması ilə bağlı ənənənin formalaşdığını bildirib: “Hər il Kino Günü qeyd olunan zaman bir filmin təqdimatını keçiririk. Bu gün də hamımızın ağrılı yeri olan Qarabağdan bəhs edən “Dolu” filmi təqdim olunur. İnanıram ki, bu film hər kəsin ürəyində əks-səda doğuracaq”.

Nazir bir qrup kino xadiminin yeni yaratdığı Azərbaycan Respublikası Kinomotoqrafçılar İttifaqının fəaliyyətinə də toxunub. O bu qurumun təzə yaradılmasına baxmayaraq uğurlu fəaliyyət göstərəcəyinin hiss olunduğunu qeyd edib: “Dövlət olaraq biz bu İttifaqın fəaliyyətinə dəstək verəcəyik”.
Sonra Azərbaycan prezidenti İlham Əliyevin sərəncamı ilə təltif olunmuş bir qrup mədəniyyət xadiminə medallar verilib.

Tədbirdə çıxış edən Azərbaycan Respublikası Kinematoqrafçılar İttifaqının sədri Şəfiqə Məmmədova bir neçə gün əvvəl rəhbərlik etdiyi təşkilatın yaranmasının 1 ayının tamam olduğunu bildirib: “Bu qısa müddətdə İttifaqa üzvlüklə bağlı 270-dən artıq ərizə daxil olub”.

Azərbaycan Respublikası Kinematoqrafçılar İttifaqının təsis etdiyi mükafatlar kino xadimlərinə təqdim olunub. İttifaqın təsis etdiyi “Milli kinonun inkişafına verdiyi töhfələrə görə” mükafatı isə bu il xalq artisti Yaşar Nuriyə təqdim edib. Qeyd edək ki, bu mükafat hər il bir kino xadiminə təqdim olunacaq.

Daha sonra tədbirdə Qarabağ mövzusundan bəhs edən “Dolu” filminin təqdimatı keçirilib.