Yoldaş Bağırov, mənim nikahdankənar qızım var

Sənət

Ana səhifə
Sənət

Yoldaş Bağırov, mənim nikahdankənar qızım var

8 sentyabr 2011

11:35

Azərbaycan K (B) P Mərkəzi Komitəsi M.C.Bağırov Yoldaşa

Siz dəfələrlə xəbərdarlıq etmisiniz ki, partiya üzvü öz ictimai və şəxsi həyatında heç bir faktı partiyadan gizlətməməlidir. Mənim ictimai həyatım respublikanının Partiya Təşkilatının gözü qabağında olmuşdur.

Fəaliyyətimin müsbət cəhətlərin də, səhvlərim və nöqsanlarım da Sizə yaxşı məlumdur. Bu cəhətdən partiyamız qarşısında vicdanım təmizdir. Ancaq obıvatelcəsinə hissə qapılaraq, həyatımda baş vermiş bir fakt barədə Sizə indiyədək bildirməmişəm.

İş burasındadır ki, mənim Zamirə Ibrahimova adlı qızım vardır. 1938-ci il mart ayında Leninqradda doğulmuşdur. Anası Leninqrad şəhəri Vasilyev Adaları, 12-ci xətt küçəsi, ev 15, mənzil 4-də yaşayan və uşaq müəssisələrində işləyən vətəndaş Nina Fyodorovna Buslevadır. Onunla tanışlığımız 1936-cı ilin sonlarında Leninqradda təhsil aldığım dövrdə olmuşdur.

Mirzə İbrahimov
15 yanvar 1952-ci il

Qısa arayış: Mirzə İbrahimov 1911-ci ildə anadan olub. SSRİ Elmlər Akademiyasının Leninqraddakı Şərqşünaslıq İnstitutunun aspiranturasında təhsil alan Mirzə İbrahimov burda Cəlil Məmmədquluzadə haqqında namizədlik dissertasiyası müdafiə etmişdir. Məktubda göstərilən hadisə də bu zaman baş verib.

Məktubun yazılma səbəbini gəlincə. Bu dövrdə Mirzə İbrahimova qarşı total hücumlar başlamışdı. Nigahsız övlad məsələsinin də gündəmə gətiriləcəyindən ehtiyat edən İbrahimov özü bu barədə Bağırova məlumat verməyi məqsədəuyğun saymışdır.

Azərbaycan Respublikası Prezidenti İşlər İdarəsi Siyasi Sənədlər Arxivində saxlanılan bu məktub Teyyub Qurbanın “Həqiqət olduğu kimi” kitabının 70-ci səhifəsində çap olunub.