Tahir Salahov Avropa Elm və İncəsənət Akademiyasının həqiqi üzvü seçilib

Sənət

Ana səhifə
Sənət

Tahir Salahov Avropa Elm və İncəsənət Akademiyasının həqiqi üzvü seçilib

23 avqust 2011

15:15

Azərbaycanın və Rusiyanın xalq rəssamı, Rusiya Rəssamlıq Akademiyasının vitse-prezidenti Tahir Salahov Avropa Elm və İncəsənət Akademiyasının (AEİA) incəsənət bölməsi üzrə həqiqi üzv seçilib. Bu qərar AEİA senatının iclasında Akademiyanın nominasiyalar üzrə komitəsi tərəfindən qəbul edilib.
Kulis.az-ın AzərTAc-a istinadən verdiyi məlumata görə, 2012-ci il martın 13-də təntənəli plenar iclas keçiriləcək. Rəssama bu Akademiyanın üzvlük şəhadətnaməsinin həmin iclasda təqdim edilməsi planlaşdırılır.
Hazırda Avropa Elm və İncəsənət Akademiyasının 1400-dən çox üzvü var. Onun ən məşhur üzvləri Roma Papası XVI Benedikt və 28 nəfər Nobel mükafatı laureatıdır. Akademiya Avropada fəaliyyət göstərən transmilli fənlərarası təşkilatdır.
Avropa Elm və İncəsənət Akademiyası yeddi bölmədən ibarətdir: humanitar elmlər, tibb elmləri, incəsənət, təbiət elmləri, sosial elmlər (hüquq və iqtisadiyyat da daxil olmaqla), texniki elmlər (ətraf mühitin mühafizəsi də daxil olmaqla) və dünya dinləri bölmələri. Bütün bu bölmələrdə müxtəlif layihələr həyata keçirilir, seminarlar və simpoziumlar təşkil edilir.