Azad fotoqraflar narahatdır

Sənət

Ana səhifə
Sənət

Azad fotoqraflar narahatdır

1 iyul 2011

14:47

Azad Fotoreportyorlar Birliyi bəyanat yayıb. Kulis.az saytının məlumatına görə, bəyanatda deyilir: “Azərbaycanda qəzetlər, internet saytları yerli və xarici fotojurnalistlərin çəkdiyi fotoları istinadsız çap edir. Bir neçə müstəqil fotoqraf və fotoreportyorun cəmləşdiyi Azad Fotoreportyorlar Birliyi olaraq fotoların istinadsız çapını yolverilməz sayırıq.

Biz Azərbaycan mətbuatının necə çətin vəziyyətdə olduğunu və hansı problemləri geridə qoyduğunu nəzərə alırıq. Hər zaman təqib və təzyiqlə üz-üzə qalan jurnalist, reportyor həmkarlarımızın yanında olduğumuzu, baş verən hadisələri yerli və xarici mətbuatlarda öz fotolarımızla mütəmadi işıqlandırdığımızı xatırladaraq Qərb dəyərlərinə söykənən azad media normalarına əməl etməyi tələb edirik.

Dəfələrlə jurnalistlərdən, redaktorlardan istifadə etdikləri foto məhsullarını istinadla çap etməyi xahiş etmişik. Amma bu xahişlər heç bir nəticə vermir. İstinadsız çap edilən foto məhkəmə predmeti ola bilər.

Jurnalist və reportyor həmkarlarımızı fotoların istinad məsələsində bir daha diqqətli olmağa çağırırıq. Düşünürük ki, özlərini peşəkar kimi hiss edən media funksionerləri müasir media qaydalarına riayət edəcək və hər bir fotonu öz müəllifinə istinad və onun icazəsi ilə çap edəcəklər”.

Azad Fotoreportyorlar Birliyi 2011-ci ilin fevralında yaradılıb.

Günel ƏSGƏRZADƏ