Kulis.az Cavid Qasımovun yeni şeirləri təqdim edir.
***
Bu yaşdan sonra əlağacı
Qəbrinin qapısını döymək üçündür.
Taqqıldat, Qoca, taqqıldat,
Ümidli ol.
Ya bu gün,
Ya da sabah üzünə açılacaq ...
***
Yağışdan sonra çətir,
Çiçəkdən sora arı,
Ölümdən sonra həyat,
Səndən sonra mən
Heç cürə yerimizi tapa bilmədik.
***
Bir divar qəzasından sonra
Səsim qayıdır üstümə,
Demişdim, gedənlər qayıdacaqlar.
***
Doğulduğum ölkənin xəritəsindən bilirəm,
Dənizin suyu ilə qanad çalmaq,
Böyümək mümkün deyil.
***
Gəmilərin arxasıyca
Su səpən,
Sonra da "Yolunuz açıq olsun" deyən
Birini gördünmü ?
Gördünsə,
Mayak odur.
***
Darıxmaq
Şahmat saatından fərqlənmir,
Hiss edirəm ki,
vaxt hesabı ilə
Darıxa-darıxa
Sevgiyə çoxdan uduzmuşam.
İndi ölüm ən gözəl qalaqurmadır.
Özü də qəfil.
***
Bəxtim gətirmədi, Müqəddəs ata,
Təxirə saldılar güllələnməni.
And olsun ağlayan kilsə şamına,
Bir təmiz adam da olmadı assın
İsanın boş qalan yerindən məni...
Daha diksinmirəm ağacdan düşən
Yarpağın səsinə uşaqlar kimi.
Yerin kölgəsinə and olsun, bir-bir
Şəhər heykəlləri qulaqlarıma
Gecə pıçıldayır tənhalıq himnin.
Çoxdandır yaxamdan üzüb əllərin
İtirmək qorxusu, ölüm qorxusu.
Mənə nə edəcək, Müqəddəs ata,
Uçulmuş evimə hücum çəkəndə
Dimdiyi çöp boyda sərçə ordusu?
Keçib Tanrı ilə barışmağımdan,
Gətirə bilməzsən bir yola məni.
Namaz üstündəymiş müqəddəs Məryəm,
Tətiyi sıxmağa gücüm qalsa da
Təxirə saldılar güllələnməni.
***
Balıqçı qayıqları sahildən uzaqlaşır,
Hələ günəş çıxmayıb, dan ulduzu görsənir.
Yarımcan olmuş ayın qılıncvari kölgəsi
Mışıl-mışıl uyuyan dalğalara söykənib.
Günəş qəfil boylanır avarların səsinə ,
Balıqçı qayıqları sahildən uzaqlaşır.
Dalğaların dağılan yuxusuna səmada
Qanadların əsdirən qağayılar ağlaşır.
Yarımcan olmuş ayın qılıncvari kölgəsi
İkiyə bölməsəydi balıqlar ölkəsini,
Balıqçı qayıqları sahildən uzaqlaşıb,
Tora sala bilməzdi sükutun cəbhəsini.
Əlindən nə gələcək, günahsız dan ulduzu?
Hamı öz dərdləriylə böyüyüb ayaqlaşır.
Dənizin o tayında olanlara xəbər ver,
Balıqçı qayıqları sahildən uzaqlaşır.
***
Bu il payız sən deyən çox da soyuq keçmədi,
Nə yağış yağa bildi, nə də külək dağları
Aşmağı bacarmadı heç kimin acığına.
Süpürgəçi qadınlar qızılı yarpaqları
Söyə-söyə yığmadı qara pul kisəsinə.
Şeirlərlə salındı yalançı gölməçələr,
Bir gün bizim küçədə, bir gün sizin küçədə
Qanadı tozlu-tozu rəqs elədi sərçələr.
Allah qışdan saxlasın isti keçən payızı,
Allah qışdan saxlasın bətni boş sobaları,
Qara pul kisələrin,
Adam adı daşıyan müqəddəs küçələri.
Ulduzlarla bəzənmiş qapqara gecələri
Allah qışdan saxlasın.
Bu il payız sən deyən çox da soyuq keçmədi.
"Sevgiyə çoxdan uduzmuşam..." - Cavid Qasımov

Oxşar xəbərlər

Tənlik işarəsidir güllələr! - Günün şeiri
14:41
1 aprel 2025

Ayaqyalın gəzsən, ayaqların döşəməylə öpüşəcək - Alov İnannanın şeirləri
17:00
31 mart 2025

Sizi unutmayacaq şanlı millətim əsla - Ən məşhur soyqırımı şeiri
11:05
31 mart 2025

Nə atan, nə anan, nə sevdiyin qadın... - Malik Atilayın yeni şeirləri
14:20
28 mart 2025

Oyanmazmı, kor olası baxtım, oy?! - Şair, mühacirət və sevgi
10:00
25 mart 2025

Saz bayramı, caz bayramı, qoz bayramı - Novruz şeirləri
12:00
21 mart 2025