Öpmək yox, qoxlamaq istəyəsən - Alik Əlioğlunun şeirləri

Öpmək yox, qoxlamaq istəyəsən - Alik Əlioğlunun şeirləri
18 avqust 2023
# 13:00

Bu gün tanınmış şair Alik Əlioğlunun doğum günüdür. Kulis.az bu münasibətlə onun şeirlərini təqdim edir.

Yad şəhərdə

Səhərlər durub tanımadığımız
Bir şəhərin dar küçələrini süpürürük,
zibilini daşıyırıq

Gecələr oyanıb dərisini gün yandırmış
Qıvrım cod saçlı yetim uşaqlara
Ən xoşbəxt şahzadənin nağılını danışırıq…

Kimsə gəlməlidir.
Günlər uzanır və heç kəs gəlmir.
Geriyə baxmaq dəhşətlidir.
Görürsən ki,
Illər öncə qulağını qatar relsinə dirəyib
Qatarın səsini dinləməklə
Uzaqlar arzusunda yaşadığınçün
Səni gətirib uzaqlara atıblar…

Görürsən ki, yiyəsizsən…
Görürsən ki, bu amansız məhəllədə
Günbəgün itlər də yoxa çıxır,
Pişiklər də…

Bilmirsən öldürürlər, ya azdırırlar…
Və sən
Bilmirsən hönkürüb ağlayasan
Ya sadəcə kədərlənəsən…

Elə bir doğma adam gəlməlidir ki,
Onu öpmək yox, qoxlamaq istəyəsən.
Yanında olduğuna əmin olmaq üçün
əlini üzünə qoyub yoxlamaq istəyəsən…
Günlər uzanır
Heç kəs gəlmir…

Və sən bir-bir ölürsən…

Atamın və oğlumun xatirəsinə.

Martın son günləridir.
Ayaqüstə dayanıb
Hamının susduğu kimi susuram.

Sinəmə çəkdiyim hava
Ayağımı basdığım torpaq
Məni sərxoş edir...

Dağın başında kimsə gedir.
Uzaqlaşmaqda...
Dönüb boylanır,
Havada yellənir bir əl...

Çağırır:
Gəl, gəəl!

Bilirəm ki, indi getməsəm
Bu köhnə evdə
Toz torpaq,
Köhnə şəkillər,
Çirkli pəncərələr
Və bozarmış paltarlarım
Var...

Bilirəm təklikdə öləcəm burda...
Martın son günləridir
Həyətdə oturub
Hamının susduğu kimi susuram.
Küçələr boşdur,
Uşaqlar oynamır.
Adamlar köçüb gedib.
Bütün qəsəbə
Sükut içində...
Mən öz evimi sevirəm!

Mart bitir.
Pəncərə önündə
Hamının susduğu kimi susuram:

Həyətimdəki boş yelləncək
Mənimlə birgə gözləyir:
atam – qucağında oğlum – gələcək!

Fəridəyə yazdığım şeir

Çiçəklərə gözlərinin rəngini,
Küləyə saçının ətrini,
Uşaqlara sevincini verdim...
Mənə əllərin qaldı.
Əllərindən tutub
Apardım...

Adını yaşadığım küçəyə qoydum...

Səndən başqa hamı bilir.
Ünvan: Fəridə küç. 1

Sənin olmamağın
Fəlakətdi, dost...
Tez qayıt...

Sökük divarlardı vətən,
Qazılmış yerdi torpaq...

Soyuqqanlı qadındır ana,
Küçələrə tökülmüş
ölü göyərçinlərdir yollar...

Tez qayıt dost...
Üşüyən əllərinlə əllərimi tut...
Bağrına bas, dost...
Sağlığımı iç:
De ki,
Allah səni öldürsün!

Atamın əziz xatirəsinə

Yuxuda atamı gördüm...
Hələ də həminki kimi arıq
və ciddidir...

"Ata, adamlar məni yaman incidir..."- dedim.
Gözü yaşardı...

Sonra hardasa
top oynadıq...
Mən uddum!

Atam məni qucağına
alıb başımdan öpdü...
Sonra yerimə uzandım,
üstümü örtdü
və getdi...

# 2234 dəfə oxunub

Oxşar xəbərlər

Ələ almağa çalışdığım, amma əlində qaldığım Hamartia... - Furqan Əliyevin şeirləri

Ələ almağa çalışdığım, amma əlində qaldığım Hamartia... - Furqan Əliyevin şeirləri

14:45 26 avqust 2025
Xərçəng preparatları uzaq keçmişin acı xatirəsi... - Günel Mehrinin şeirləri

Xərçəng preparatları uzaq keçmişin acı xatirəsi... - Günel Mehrinin şeirləri

13:25 25 avqust 2025
Yaddaşına yaxşı bax, unutduğun yerdәyәm... - Məmməd İsmayılın şeirləri

Yaddaşına yaxşı bax, unutduğun yerdәyәm... - Məmməd İsmayılın şeirləri

16:58 19 avqust 2025
Dilim Təbriz haraylar... - Gülbacı Nağdaliyevanın şeirləri

Dilim Təbriz haraylar... - Gülbacı Nağdaliyevanın şeirləri

11:30 15 avqust 2025
"Tutdum yıxılmağa qorxduğum yerdən..." - Salam Sarvanın şeirləri

"Tutdum yıxılmağa qorxduğum yerdən..." - Salam Sarvanın şeirləri

16:45 12 avqust 2025
Yekaterina kimi hərəmxana qurmuşam yalqızlığımdan... - Ülviyyə Lalənin şeirləri

Yekaterina kimi hərəmxana qurmuşam yalqızlığımdan... - Ülviyyə Lalənin şeirləri

17:00 28 iyul 2025
#
#
Ana səhifə Yazarlar Bütün xəbərlər