Bu gün mərhum yazıçı Günel Eminlinin həm doğum günü, həm də anım günüdür. Kulis.az Könül Arifin ona ithaf etdiyi şeiri təqdim edir.
KÜLƏK ƏSƏNƏCƏN
Günel Eminliyə
Külək əsənəcəndir
Ağacların küskünlüyü:
Dinlə -
Az öncə fikrə gedən küknarlar
İndi başlarını bir-birinin çiyninə qoyub
Xısın-xısın pıçıldaşar...
Külək əsənəcəndir
Ağacların tənhalığı:
Avtobus pəncərəsindən içəri keçən
Qara tutun mehriban budaqları
Uşaqlığımıdakı insanları xatırladır mənə –
Qayğıkeş,
Əlidolu,
İstiqanlı...
Külək əsənəcəndir
Yarpaqların durğunluğu:
Bax -
Mehin müjdəsi gəldimi,
Həvəslə alqışlayar yarpaqlar
Göy üzünü!
Külək əsənəcəndir...
Külək əsənəcəndir ağacların küskünlüyü...
Ölüm...
Bilirdinmi -
Ölüm gələnəcəndir
Dostların küskünlüyü...
16.06.2023
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
