Şuşaya yağış yağır - Elçin Mirzəbəylidən yeni şeir

Şuşaya yağış yağır - Elçin Mirzəbəylidən yeni şeir
14 may 2022
# 12:41

Kulis.az şair Elçin Mirzəbəylinin Şuşada keçirilən “Xarıbülbül” beynəlxalq folklor festivalında yazdığı şeiri təqdim edir.

Yuxum ərşə çəkilib,
Hər kirpik fırça kimi gözlərimə yol çəkir,
Yaddaşımın küncünə qonan xatirələrdən
Ürəyimə süzülür...
sözlərimə yol çəkir,
Baxışıma yol çəkir...
30 illik həsrətin
Buluduna yol çəkir,
yağışına yol çəkir...
Çəkir zülmət gecədən,
çəkir səhərə doğru,
Gözlərimi açıram “üçüncü avtobus”da,
Yollar çəkib aparır qala-şəhərə doğru...

...Hər baxışda bir ümid, hər ümiddə bir işıq,
Bir az alatoranlıq, bir az nisgil...
Qarışıq...
Duyğularım hələ də körpü çəkir həsrətə:
İlahi, indi görən nəyə bənzəyir Şuşa?
Kimə bənzəyir Şuşa?
Bəlkə son ayrılığa?
Bəlkə ilk məhəbbətə?
...Tərk edilmiş yolların geriyə dönüşünə?
Susuzluqdan çat verib qanayan dodaqların
yağışla öpüşünə?
Əsarətin sonuna...
Azadlığın dadına...
Ən əziz adamını qarşılayan qadına...

...Dağlar çənlə qolboyun,
Yollar sislə sarmaşıq...
Dəqiqələr süzülür saat əqrəblərindən,
Vaxt sınır,
zaman çökür.
Sanki uçan xalçadı nağıllar aləmində -
Şuşaya yağış yağır,
Şuşaya duman çökür...

***

Buludlar damla-damla
Layla deyir qalaya.
Ağaclar yallı gedir,
Dağlar durur halaya...
Şuşaya yağış yağır...

Yağış damlalarıyla
Rəqs eləyir çiçəklər.
Çiçəklərin telinə
Sığal çəkir küləklər,
Şuşaya yağış yağır...

İndi Cıdır düzündə
Süslənir xarıbülbül.
Yarıçiçək, yarıquş,
Yarıeşq, yarıbülbül...

İndi Cıdır düzündən
Ucalır cəngi səsi.
Daha şikəst deyildir
Qarabağ şikəstəsi...

Daha şikəst deyildir
Yollar, cığırlar, izlər.
Yurd həsrətli baxışlar,
Vətən sevdalı gözlər.

Şuşaya yağış yağır –
Azadlıq havasında...
Buludlar xumarlanır
Şuşanın səmasında...

...Şəhidlərin ruhu da
Sıldırım qayalardan
Şuşaya işıq saçır...
Şuşa sevgi, gözəllik,
Əzm, qürur, rəşadət...
Şuşa yaraşıq saçır.

Necə xoşbəxt görünür
Minarələr, türbələr...
Nə qaçqın var, nə köçkün,
Nə didərgin,
Dərbədər...

Damlalar rəqs eylərir -
Dincəlir əziz Şuşa.
Vətən, yurd sevgisindən
Dirçəlir əziz Şuşa...
Şuşaya yağış yağır...

Elçin Mirzəbəyli

12 may 2022-ci il
Bakı-Şuşa-Bakı

# 2437 dəfə oxunub

Oxşar xəbərlər

Yazıçıları əl meymununa çevirən Şahbaz Xuduoğlu – Ulucay Akif yazır...

Yazıçıları əl meymununa çevirən Şahbaz Xuduoğlu – Ulucay Akif yazır...

13:04 30 may 2023
Seymur Baycan bu hekayədə ağını çıxarıb - Orxan Həsəni yazır...

Seymur Baycan bu hekayədə ağını çıxarıb - Orxan Həsəni yazır...

10:45 30 may 2023
Ziqmund Freydin ən qəribə xüsusiyyətləri və fobiyaları

Ziqmund Freydin ən qəribə xüsusiyyətləri və fobiyaları

11:00 28 may 2023
Nə olsun ki, Təbrizdə yaşayıram? - Güneydən şeirlər

Nə olsun ki, Təbrizdə yaşayıram? - Güneydən şeirlər

17:35 26 may 2023
Amerikan tərzi rep deyən tüfeyli oğlan! - Ulucay Akif yazır...

Amerikan tərzi rep deyən tüfeyli oğlan! - Ulucay Akif yazır...

13:39 26 may 2023
Bunu ancaq bir gənc edə bilər - Hekayə müzakirəsi

Bunu ancaq bir gənc edə bilər - Hekayə müzakirəsi

14:48 24 may 2023
# # #