Bu gün Xalq şairi Xəlil Rza Ulutürkün anım günüdür.
Kulis.az bu münasibətlə "Günün şeiri" layihəsində onun Lefertovo həbsxanasında olarkən həyat yoldaşına yazdığı "Qurban olduğum" şeirini təqdim edir:
Hardasan, ey mənə canımdan əziz,
Dağına, daşına qurban olduğum!
Orda nalan qalıb mənsiz Firəngiz,
Gözünün yaşına qurban olduğum!
O mənim ilk müjdəm, ilk qaranquşum,
Yuxusuz gözlərim, dağılan huşum.
Vüsalı yazımdır, hicranı qışım,
Yazına, qışına qurban olduğum!
Necə darısqaldır bu qara məhbəs,
Göyərçin əlinə əllərim yetməz.
Umduğum doğma səs, o isti nəfəs,
Bircə baxışına qurban olduğum!
Mən sənin uğrunda atıldım oda,
Dəmirdim əridim, döndüm polada.
Nakəs qarşısında, yad qabağında
Ey məğrur başına qurban olduğum!
Axmasın gözündən yaş almaz-almaz,
Məhəbbət qocalmaz, günəş qaralmaz.
Yüz illər keçsə də, gəncliyin solmaz,
On yeddi yaşına qurban olduğum!
Mən kiməm?.. Əyilməz bir kədər dağı
Sədaqət ocağı, ümid çırağı.
Sən başım üstündə haqqın bayrağı,
Ey haqq savaşına qurban olduğum!
Uzaq xatirələr toyda-düyündə,
Ömür gəldi, keçdi darda, sürgündə,
Kişilər dünyada seyrələn gündə,
Kişi duruşuna qurban olduğum!
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər