Anam çətirli anaların sırasında dursun

Poeziya

Ana səhifə
Poeziya

Anam çətirli anaların sırasında dursun - Günün şeiri

13 noyabr 2023

14:00

Bu gün şair Fuad Cəfərlinin doğum günüdür.

Kulis.az şairi təbrik edir və "Günün şeiri" layihəsindən "Çətir" şeirini təqdim edir.

Bağışla məni, ana, bağışla,
Yenə payız küçəmizi salamladı yağışla.
Yenə mən sənə çətir ala bilmədim,
Bağışla məni, ana, bağışla.

Gec gəlib tez gedən fəsilə payız deyilir,
Çətir ala bilənlər çölündə,
Ala bilməyənlər hər yağış damcısında içində əyilir
Hər əyildikcə, "inşallah, gələn payız, gələn payız" deyir.

Mən bitdim, bu payızlarsa bitmədi...
Hər gələn payız, gələn payız dedim.
"Bu payız birtəhər keçir, ana,
Gələn payız çətir alaram",- dedim.

Ovuc boyda otaqda
Özümə də, sənə də dünya boyda ümid verdim.
Yenə yenildim, yenə evə çətirsiz gəldim.
Bağışla məni, ana, bağışla.

Sürətim yox qaçıb keçəm,
Qanadım yox uçub keçəm,
Nə olardı bir səfərində,
Payızların birini keçəm?!
Anama yaraşan, anamı qoruyan bir çətir seçəm.
Tutacağı anamın əlləri kimi yumşaq,
Dirəyi qüruru kimi möhkəm,
Örpəyi üzü kimi ağ olsun.
Və nəhayət, anam çətirli anaların sırasında dursun.
İnşallah, gələn payız, anam, gələn payız...