Türkcə sevmək məcburiyyəti

Türkcə sevmək məcburiyyəti
5 yanvar 2015
# 15:01

Dünən işə gələndə (parkın adını özüm yazmadım ki, min cür söz qoşacaqlar) təsadüfən bir doğma sima gördüm. Sağ əlində bir tifili oğlan, sol əlində yenə bir oğlan uşağı, amma yaşca böyük... Dilimi dişlədim vallah.

Həmin Mədinəydi. Həmin də deyirəm, əslində həminki deyildi. Kökəlib, bədəni hər iki tərəfdən “tökülüb”. Bircə gözləri o gözlərdir. Xeyli dərdləşdik, kövrəldim düzü. Hər şeyin üstündən keçirəm, başqadı məqsədim. Deməli, keçmiş sinif yoldaşımla rastlaşıram ki, sevdiyim olub. Ordan-burdan söhbət eləyirik, məlum olur ki, qəssabdı həyat yoldaşı. Hər gün içir, düşür bunun üstünə, urvatdan salır qızı. Hə, dəqiq bilirəm ki, indi bəzi sənətin keşiyində duran oxucular dodaqlarını əyirlər. Dodaq dedim, yadıma düşdü, mən o qızı xalına görə sevmişdim, hə, dodağında xalı vardı... Deyir ki, zəqqumlanıb gəlmişdi, nə təhər vurdusa, dodağım cırıldı, xalımı itirdim. Məsələnin sonrası sizlik deyil.

Yaxın oturun, ikicə məsələni müzakirə eləyək. Ər arvadını döyər də, söyər də, lap lazım gəlsə öldürər də. Ağzında arvad deyirsən e... Kim ki, arvaddı o, döyüləcək də, əziləcək də! Evlənmək başqa, arvad almaq başqa. Alırsan, olur şəxsi mal, döy nə qədər istəsən! Bizim qadınlar daha çox arvad olmağa meyillidi. Ona görə belədi ki, kişilərimiz evlənəndən sonra sadəcə ata və ər ola bilirlər. Yenə məqsədim bu deyil. Kim döyür, kim söyür.

Uzun müddətdi evli olan, nişanlı olan, virtual məhəbbət yaşayan dostlarımı izləyirəm. Konkret türkcə sevirlər, türkcə dalaşırlar, türkcə küsürlər. Təxmini belə olur da “aşkım”, “sana küsüm”, “heyatım”, “biricik”, “git yaa”, “yapmaa” və s. Biri desin, evli olduğu qadını necə oxşayıb, o biri də nişanlısını. Görəcəksiniz ki, düz deyirəm. Görməsəniz də düz deyirəm. Gələk bizim dilə. “Azz, arvad”, “kopakqızı” və s. Yaxşı yadıma düşdü, bizdə “Sevgilim” sadəcə şərab markasıdı. Niyə gənclər türkcəyə qaçırlar? Elə anlayışlar var ki, bizim dildə onların adı yoxdu. Allahı ərəbcə tanıdığımız kimi, münasibətləri də türkcə qururuq. Amma, arvadı azərbaycanca döyürük. Bu məsələyə ağsaqqallar bir izahat verər, görək niyə türkcə gedir bütün cütləşmələr? Gəlmişkən bir sual da verim. Mən deyim siz təsəvvürünüzdə canlandırın “olayı”. Qadın özünü təqdim edir, “Filankəs xanım”, ya da biri sənə mesaj yazır, nömrəni tanımırsan və geri yığırsan:

- Alo, kimdi?

- Filankəs müəllim.

Məlum olur ki, işlədiyin yerdən vəzifəli biridir. Adlarının sonuna xanım, müəllim kimi statuslar artırmaqda məqsəd nədir? Bunu elə-belə dedim e... ciddiyə almayın. Nə qədər ki, bayram günündən yeməklər qalıb, deməli, hələ də bayramdır.

Təbrik!

# 524 dəfə oxunub

Müəllifin son yazıları

# # #