Xəzər Universitetinin F.Əmirov adına Konsert-Konfrans Mərkəzində Qarabağda qazanılan Böyük Qələbənin birinci ildönümü - ilk Zəfər Bayramı qeyd edildi.

Kulis.az xəbər verir ki, bayram tədbirində 44 günlük müharibənin xronikası əsasında hazırlanmış videoçarx təqdim olunduqdan sonra şəhidlərin xatirəsi bir dəqiqəlik sükutla yad edildi, Azərbaycan Respublikasının Dövlət himni səsləndirildi.

Tədbirin rəsmi hissəsində Ümummilli lider Heydər Əliyevin "Türkiyə və Azərbaycan bir millət, iki dövlətdir" və böyük öndər Mustafa Kamal Atatürkün "Azərbaycanın kədəri bizim kədərimiz, sevinci bizim sevincimizdir" kəlamlarına əsaslanan Türkiyə-Azərbaycan qardaşlığına dair videoçarx təqdim edildi, sonra Türkiyənin Akdeniz Universitetinin professoru Şenol Kantarcı öz ürək sözlərini tədbir iştirakçıları ilə bölüşdü.

Xəzər Universitetinin 44 günlük müharibədə iştirak edən məzunlarının səhnəyə çıxması böyük coşqu ilə qarşılandı. Xəzər Universitetinin təsisçisi, Direktorlar və Qəyyumlar Şurasının sədri professor, akademik Hamlet İsaxanlı qazi məzunları salamlayaraq, onlarla qürur duyduğunu söylədi. Qazi məzunlardan baş leytenant Cavad Həşimov dəvət üçün təşəkkür edərək, doğma universitetə minnətdarlıq duyğularını ifadə etdi.

Musiqili-bədii kompozisiya Xəzər Universitetinin tələbələri Ləman Rzaquliyeva, Təhmin Bəkirov, Vəlixan Vəlixanlı, Yeganə Quliyeva, Nəzrin Əsgərova, Səma Mehdiyeva, Ləman Hacılı, Solmaz Mirzəliyeva, Aytən Kərimxanova və İmaməli İbrahimovun müxtəlif janrlarda hazırladıqları çıxışları ilə davam etdi.

Zəfər bayramında istedadlı müğənni Həmid Həmzəyev “Döyüşə gedirəm, ana”, “Dərviş” qrupunun üzvü Cavidan Məmmədov isə “Cənab leytenant” mahnılarını ifa etdilər. “Dərviş” qrupunun ifasında səsləndirilən maraqlı kompozisiyalar (“Xudayar təsnifi” və “Vətəndir” kompozisiyası) tədbir iştirakçılarının alqışları ilə qarşılandı.

Zəfər Bayramı Xəzər Universitetinin tələbələri və “Dərviş” qrupunun birgə hazırladıqları “Çırpınırdı Qara dəniz” musiqili-bədii kompozisiya ilə yekunlaşdı.

Tədbirdən sonra professor, akademik Hamlet İsaxanlı başda olmaqla universitetin rəhbərliyi və professor-müəllim heyəti ilə qazi məzunların səmimi görüşü keçirildi.

• "İndi yalnız bir cəbhə var!" - Əvvəlki ədəbi nəsillə əlaqə lazımdırmı?
• “Baku Cinema Breeze”in 2025-ci buraxılışı keçiriləcək
• “Kainat Gözəli 2025”də qalmaqal