“Namiq Ağayev piar qurmaq üçün bizim nüfuzumuzdan istifadə edir.” Bu sözləri Kulis.aza açıqlamasında CinemaPlus kinoteatrlar şəbəkəsinin idarə heyətinin üzvü, rejissor-prodüser Cəfər Axundzadə bildirib.

O, daha sonra əlavə edib ki, aktyor-rejissor Namiq Ağayevin “Ol” filminin premyerası zamanı CinemaPlus tərəfindən hər bir şərait yaradılıb: “Filmin premyerası zamanı səs problemi yaşanıbsa bu onların səhlənkarlığıdır. Bizim bu filmlə heç bir qəsdimiz ola bilməz. CinemePlus kinoteatrları premium kinoteatrlarıdır. Yəni burda pop-kornun yağı belə xaricdən gətirilir, o ki, qaldı texnikamız ola. Namiq bəyin filminin premyerasının getdiyi zal Dolbi Atmos zalıdır. Bu, Qafqazda yeganə bu formatda olan zaldır. Bu günədək CinemaPlus kinoteatrlar şəbəkəsində təqdimatı baş tutan heç bir film ilə səs və ya görüntü problemi yaşanmayıb. 2 il müddətində ərsəyə gələn film kinoteatra qala premyera günü təhvil verilib. Biz Namiqə dəfələrlə dedik ki, sizin filmin standartları bizim texnikanın tələblərinə cavab verə bilməyəcək. O isə bizə qulaq asmadı, üstəlik filmin nümayişi üçün gətirdiyi rəqəmsal daşıyıcısı neçə dəfə tələblərə cavab vermədi. Bizim əməkdaşlar səhərə qədər filmi yoxlayıblar, ancaq onlar bununla məşğul olduqları zaman Namiq Ağayev dəhlizdə yatırmış. Mən bunları demək istəmirəm, Namiq Ağayev məcbur edir. Yəni biz və bizim əməkdaşlar əlimizdən gələni eləmişik.”

CinemaPlusun idarə heyətinin üzvü daha sonra əlavə edib ki, onlar “Ol” filminin nümayişi üçün bir həftəlik müqavilə bağlasalar da, ikinci həftəyə keçib, hələ nümayişdən çıxarmayıblar. Bununla belə gəlib baxan yoxdur, zallar boşdur: “Namiq iddia edir ki, biz başqa filmləri nümayişdən çıxarmaq üçün haqsız rəqabət aparırıq. Düz demir. Mən Namiq Ağayevin filminə baxmışam, çox da gözəl filmdir, amma janrı elədir ki, nə bizim “Kəklikotu” filmi ilə rəqabət aparacaq səviyyədədir, nə də ki, başqa filmlərlə. Çünki bizim filmlər kütləvi, “Ol” isə sənət filmidir. Əgər Namiq filmini piar etmək üçün bu yolu seçibsə çox səhv edib, bu piar deyil, belə piar olmur.”

Xatırladaq ki, “Ol” filminin rejissoru, aktyor Namiq Ağayev Kulis.aza açıqlamasında CinemaPlus kinoteatrlar şəbəkəsinin filmin premyerası zamanı qəsdən texniki problem yaratdığını demişdi.

• Qara bayram - Mövlud Mövludun hekayəsi
• Atası dövrünün tanınmış xanəndəsi olan, 15 yaşında ərə verilən azərbaycanlı aktrisa kim idi?
• "Küçələri, çayxanaları gəzib satıram" - Corab satmaqla dolanan Allahverdi Yolçuyevlə müsahibə