Əkrəm İmamoğlunun İstanbul Bələdiyyə Başqanı seçilməsi Azərbaycanda da böyük marağa səbəb olub. O cümlədən ədəbiyyat adamları arasında... Məsələnin aktuallığını nəzərə alıb seçkilərlə bağlı Türkiyədə yaşayan Azərbaycanlı qələm adamlarının təəssüratlarını öyrəndik. Cavabları təqdim edirik.

Müşfiq Şükürov

Filosof

- Təbii ki, Türkiyə hər bir azərbaycanlının xüsusi marağında olduğu bir ölkədir. Biz də istəyirik ki, qardaş Türkiyədə hər şey çox gözəl olsun. İmamoğlunun qələbəsi burada böyük bir coşqu yaradıb. Çünki bu, sanki bir eranın bitməsi, yenisinin başlanğıcı kimi qavranılır. Uzun illər hakimiyyətdə olmuş və zənnimcə Türkiyə üçün önəmli işlər görmüş, lakin indi yaşlanmış, ideyaları köhnəlmiş “AK parti erası” sona yaxınlaşır. Bütün avtoritar gəlişmələrə rəğmən Türkiyə demokratiyasının işlək olmasını, seçki sisteminin sağlamlığını görmək əlbəttə ayrı bir sevinc. Son 25 il burada dindarlar və laiklər arasında gedən siyasi diskussiya məncə hər iki tərəf üçün faydalı oldu. Hər iki tərəf öz səhvlərini anladı. CHP bu dərkdən yenilənərək çıxdı. Son qələbə də onun göstəricisidir. Əminəm ki, AKP elektoratı (partiyalar dəyişə bilər) da yenilənəcək və Türkiyə siyasi həyatını inkişafın yeni mərhələsinə götürəcək. Bu, bir siyasi dialektik gedişatdır. Sonu olmayan.

Aqşin Yenisey

Şair

- Türkiyədə keçirilən seçki prosesindən biz, sadəcə, nələrisə öyrənə bilərik. Ancaq buradakı seçkilərin Azərbaycan insanının həyatına birbaşa dəxli yoxdur. Nəticələr Türkiyə vətəndaşları üçün yaxşı olacaqsa, buna sevinəcəyik, pis olacaqsa, üzüləcəyik.

Şəbnəm Karslı

Yazar

- Öncəliklə əsas milli iradənin tanınması və qəbul edilməsidir. Kimin seçilməsindən asılı olmayaraq şəhərimiz üçün xeyirli olacağını ümid edirəm. Demokratiya, şəffaf seçki mənim üçün kiminsə seçilməsindən daha önəmlidir. Bir MHP-li olaraq Əkrəm İmamoğlunu təbrik edirəm. Uğurlu beş il arzulayıram.

• Stallonenin kult filmi əsasında serial çəkiləcək
• Messi futboldan böyükdür!
• "Kişilər nə danışır?" filminin aktrisası vəfat etdi