Kulis.az kitabla bağlı yazıçıların başına gəlmiş qeyri-adi əhvalatları və faktları təqdim edir.

Sabir Rüstəmxanlının “Ömür kitabı”nı qızlar cehiz kimi sandıqlarına yığırlarmış.

***

Sovetlər dönəmində Heydər Əliyev Bərdə pambıqçıları ilə görüşür və onların problemləri ilə maraqlanır. Pambıqçılar ondan “İtkin gəlin” kitabını istəyirlər. H.Əliyev Bakıya qayıdanda kitabın satılıb qurtardığını öyrənir və yenidən 100 min tirajla çap olunması üçün göstəriş verir.

***

Hüseyn Arifin təzə kitabı çap olunub. Zəlimxan Yaqub zəng vurub şairi təbrik edir, sonra isə deyir:

- Qağa, burdakı şeirlərin bir neçəsi mənim şeirlərimdi.

Hüseyn Arif kefini pozmadan cavab verir:

- Nolasıdır? İkimiz də xalq üçün yazırıq da...

***

Əkrəm Əylislinin “Daş yuxular” əsərindən sonra kitabxanalarda və mağazalardakı kitabları yığışdırıldı. Bütün kitabları tonqala atılıb yandırıldı.

***

Rafiq Tağıya dəyən altı bıçaq zərbəsindən biri papkasındakı qalın kitaba dəyir. O bıçaq zərbəsi düz ürəyinin üstünə gəlirmiş. Qalın kitab ona dəyən zərbəni zərərsizləşdirib.

***

Ramiz Rövşən imza günlərinin birində kitabını imzalayarmış. Oxuculardan biri onun “Nəfəs” kitabının köhnə nüsxəsini şairə uzadır. Ramiz Rövşən kitabın pirat nüsxə olduğunu bildirirək imza etməkdən imtina edir.

***

Yazıçı Əlisa Nicat ilk kitabını çap etmək üçün evini satmışdı.

***

Aqil Abbas heç kimin Bakıda tapa bilmədiyi kitabı Moskvada tapır. Yaxın dostunun toyuna həmin kitabı nəmər əvəzi yazdırır.

***

Hamınız o kişini görmüsünüz yəqin. Metroda kitab satırdı. Adı Bəşir Kəsərli idi və başına yaylıq taxırdı. Yaylığın üzərində də “Qarabağ” yazılmışdı...

***

Rasim Qaraca Azərbaycan dilində işlənən bütün söyüşləri bir kitaba yığmışdı, adını da “Arqo deyimlər” qoymuşdu. Kitab səs-küy yaratdı və tezliklə kitab mağazalarından yığışdırıldı.

***

Əlisəmid Kür şeir kitabını iki cür çıxarırmış. Biri nazik, biri qalın üzlü. Qalın üzlülər mötəbər, hörmətli, vəzifəli adamlar üçünmüş.

***

Yafəs Türksəs Rasim Qaracanın kitablarını yığıb satırmış. Hamıya da kitabın müəllifinin özü olduğunu söyləyirmiş. Bu yalan Rasim Qaracanın sinif yoldaşına tuş gələnə qədər yaxşı gedirdi. Sinif yoldaşı yalanı eşidəndə isə Rasim Qaraca qiyafəsinə girmiş Yafəs çarəsiz həqiqəti deməyə məcbur olub.

***

Kəramət Böyükçölün son vaxtlar təkbaşına reallaşdırdığı iki aksiya diqqətləri üzərinə çəkmişdi: kitabını 100 manata satışa qoymaq və çayxanada kitablarını müxtəlif qiymətlərə satmaq.

***

Ayxan Ayvaz “Buri” hekayələr kitabının imza günündə maraqlı bir aksiya etmişdi. Hər kitab alan oxucuya bir dilim çörək hədiyyə olunurdu.

***

Şəhriyar Del Gerani kitabın az satıldığı bir vaxtda öz şeir kitabını 10 manat qiymətinə satışa qoymuşdu. Tələbələrə isə endirim eləmişdi. İmza günündə kitabların hamısı satılmışdı.

• Pikassonun nifrət və sevgi qazanan əsəri: "Avinyon qızları"nın sirri nədədir?
• "Könüldən düşən insan unudulmağa məhkumdur..." - Necip Fazıl Kısakürek
• Milli Dram Teatrında “Kral Lir”in premyerası oldu