Xəbər verdiyimiz kimi, Azərbaycanın təhsil naziri Ceyhun Bayramov “Oxu günü” tədbirinin keçirilməsi haqqında əmr imzalamışdı. Əmrə əsasən, “Ümumdünya Kitab və Müəlliflik Hüququ Günü” münasibətilə respublikanın rayon və şəhərlərində ümumtəhsil məktəblərinin iştirakı təmin olunmaqla kütləvi “Oxu günü” tədbiri keçiriləcək.

2015-ci ildə oxşar layihəni “Hədəf” nəşrlərinin rəhbəri, naşir, yazıçı Şamil Sadıq başlatmışdı. Kulis.az məsələ ilə bağlı onun fikirlərini öyrənib:

“Naşir olaraq həm özümüzü, həm də bütün kitabsevərləri təbrik edirəm. Biz “Oxu günü” layihəsinə 2015-ci ildən başlamışdıq. “Hədəf” nəşriyyatında başlatdıq bu layihəni. Roliklər hazırladıq, ictimaiyyəti məlumatlandırdıq. Birinci dəfə Binəqədidə, daha sonra Nəsimi rayonunda “Oxu günü” layihəsini reallaşdırdıq. İki il dalbadal Heydər Əliyev Mərkəzi, Təhsil Nazirliyi, Elmlər Akademiyası ilə birgə fəaliyyət göstərdik. Mədəniyyət Nazirliyi də bizə dəstək olmuşdu. Biz möhtəşəm tədbirlər keçirdik. Bu yaxında Təhsil Nazirliyinə məktublar yazdıq. Məktubumuz yolda olarkən nazirliyin “Oxu günü” layihəsi başlatdığını eşitdik. Bu çox sevindiricidir. Arzumuz odur ki, bu layihə bütün ölkəni bürüsün. Bu layihəyə biz başlamışdıq, indi daha səmərəli, daha ciddi bir layihə kimi ölkə ərazisində yayılacaq. Bizim layihəmiz uğurluydu, amma rayon məktəblərinə gücümüz və səlahiyyətimiz çatmırdı. Könüllülük prinsipi ilə layihəni həyata keçirirdik. İndi rəsmiləşdi. Daha mütəşəkkil hal alacaq. Artıq bu işin kimin başlatdığı önəmli deyil. Əsas odur ki, bu cür ciddi bir iş artıq rəsmiləşdi. Ümid edirəm ki, “Hədəf” nəşrləri də bu layihənin tərkibində olacaq”.

• Teatral işıqda İsanın cansız bədəni – Karavacconun “Məsihin dəfni” tablosu
• "İnsan dünyada kölgəsi qədər deyil, ürəyi boyda yer tutur..." - Yaşar Kamal
• "Düşünmək prosesinin özü təhlükəlidir..." - Hanna Arendtdən sitatlar