Bəzən heç kimin gözünə görünmək istəmərik. İnsanlar bizi görməsin, amma biz öz istəklərimizi yerinə yetirək. Bəs yazarlarımız gözəgörünməz olsaydılar nə edərdilər?

Kulis.Az bu barədə yeni nəsil yazarlar arasında sorğu keçirib.

Səhər Əhməd

- Gizlincə sizin redaksiyaya gedərdim, görüm müəlliflərdən nə danışırsınız?

Aqşin Yenisey

- Cıdır düzündə kabab çəkərdim.

Kəramət Böyükçöl

- Aqil Abbasın cibindən pul oğurlayardım.

Alpay Azər

- Ərk etdiyim dostlarla məzələnərdim. İşdə, ya evlərində başları qarışanda qəfil qabaqlarına meyvə, çərəz qoyardım, ya qıraqdan onlara fındıq, qoz ləpəsi atardım. Qaldı ki, ciddi işlərə, gedib o biri ölkələrdən Azərbaycan üçün lazım olan kəşfiyyat məlumatları gətirərdim.

Könül Arif

- Floridaya uçardım.

Hikmət Orhun

- Görünəndə xətrimə dəyən adamları təpikləyib qaçardım, hamamda çimən yerdə ayaqlarının altına sabun qoyardım.

Günel Natiq

- Uşaqlıqda “Gözəgörünməz adam” əsərini oxumuşdum və uzun müddət özümə gələ bilməmişdim. Mənə elə gəlirdi ki, gözəgörünməz adam məni hər yerdə təqib edir... Uşaqlıq illərimin qorxulu röyası idi... Sonra gözəgörünməz adam obrazında özümü təsəvvür edirdim. Ən çox sirli olan yerlərə nüfuz etmək istəyirdim. Sirli otaqlara, şəhərlərə, ölkələrə... İndi də elə fikirləşirəm, əgər gözəgörünməz olsaydım, yəqin ki, xəyalımda olan ölkələrə gedərdim.

Rəbiqə Nazimqızı

- Yəqin, bütün bədii yazı-pozuya maraq göstərən adam kimi bəzi insanların beyninə keçərdim, görüm necə düşünürlər, məntiqsiz qənaətlərə necə gəlirlər. Bir də dünyanı gəzərdim, nə viza lazım olardı, nə pasport, nə geyim-kecim.

Aqşin Evrən

- Gözəgörünməz olmaq istəməyin alt qatında insanın gizlənmək, özünə çəkilmək və nəhayətində öz varlığını inkar etmək arzusu dayanır. Lakin bu qəti yoxolma deyil: insanın cismani varlığı inkar edilsə də, fiziki üstünlükləri artır. Bu da prosesin müsbət mahiyyətli olduğunu aşkara çıxarır. Yəqin ki, mən də bu müsbət prosesdə ancaq insanlığa, bəşəriyyətin inkişafına xidmət edən gözəl addımlar ataram. Təsəvvür edin, xəbər yayılır ki, "Gözəgörünməz adam ərəb milyarderlərindən 100 milyon dollar götürərək, Somaliyə 1000 ton ərzaq alıb, içməli su kanalı çəkdirdi". Və ya "Gözəgörünməz adam son anda İrandan İsrailə atılması nəzərdə tutulan atom bombasını zərərsizləşdirdi". Mən məhz belə addımlar ataram və həmin vaxt yəqin ki, dünyada ədalət prinsipini özüm müəyyənləşdirirəm.

Ömər Xəyyam

- Hal-hazırda ən böyük istəyim məhz gözəgörünməz olmaqdı. Gözəgörünməz olub Universal Studios Hollywood-a getmək və oradan film çəkmək üçün texniki baza gətirmək. Məsələn, alexa mini (bahalı kamera yəni). İnanın ki, qaytararam sonra. Əgər elə fürsət olsa, mütləq adımı qeyd edin.

• 25 il sonra eyni paltarı geyindilər - Bekhem cütlüyü evlilik ildönümünü qeyd etdi
• O, Tupak Şakurun ölümü üçün 1 milyon dollar alıb
• Müharibə - Günün hekayəsi