İyunun 11-də Müşfiqabad qəsəbəsi yaxınlığında yerləşən Yeni qəsəbə yaşayış massivindəki Ağdam rayon 33 saylı köçkün orta məktəbində əfsanəvi kəşfiyyatçı, Aprel şəhidi, polkovnik-leytenant Raquf Orucova həsr olunmuş “Komandir” romanının təqdimat və şəhidin anım mərasimi keçirilib.

Tədbirdə Raquf Orucovun həyat yoldaşı, “Zəfər” şəhid ailələrinə dəstək ictimai birliyinin rəhbəri Sevinc Əlizadə, qardaşı Zabil Orucov, Murovda keçdiyi xidmət vaxtı onun komandiri olmuş Rasim Fərşidov, tanınmış jurnalist, Qarabağ qazisi Rey Kərimoğlu, “Komandir” romanının müəllifi Şərif Ağayar və başqaları iştirak ediblər.

Dövlət himninin sədaları ilə başlanın tədbir, Raquf Orucovun həyat və fəaliyyətini əks etdirən videoroliklə davam edib. Aparıcı Şəhla Behbudova ilk sözü məktəbin direktoru Nəsibə Hüseynovaya verib. Qonaqlara salamlayan Nəsibə xanım rəhbərlik etdiyi məktəbin kollektivi tərəfindən Qarabağ döyüşlərində şəhid olan soydaşlarımızın xatirəsinin həmişə əziz tutulduğunu qeyd edib, onların gənc nəslə tanıdılmasında görülən işlərdən danışıb.

Şərif Ağayar öz çıxışında Raquf Orucov şəxsiyyətindən danışıb, onu tanımağın, necə bir əsgər, necə bir zabit olduğunu bilməyin vacibliyindən söz açıb.

Rey Kərimoğlu vətən qarşısında hər kəsin bir vəzifəsi olduğunu bildirib. Qeyd edib ki, şagirdlərin ən ümdə işi yaxşı oxumaq, müəllim və valideynlərin başını uca etməkdir. Çünki elmi-savadı olmayan məmləkət heç vaxt qalib gələ bilməz.

Daha sonra ehtiyatda olan kapitan Rasim Fərşidov, “Vətən səsi” qəzetinin əməkdaşı jurnalist İsa Yunusoğlu, 33 saylı məktəbin müəlliməsi Azadə Quliyeva “Komandir” romanının məziyyətlərindən danışıb onu oxumağı tövsiyə ediblər.

Tədbir məktəb şagirdlərinin şeirlər söyləməsi və Abdal-Gülablı musiqi məktəbinin azyaşlı şagirdlərinin muğam ifası ilə davam edib.

Ailə adından Sevinc Əlizadə çıxış edərək tədbirin təşkili üçün məktəb rəhbərliyinə təşəkkürünü bildirib.

Sonda müəllif iştirakçılara hədiyyə olunan kitabları imzalayıb və xatirə şəkli çəkilib.

• Təbiətlə ilahi dünya arasında mistik körpü - Serafin Luinin "Həyat ağacı"
• Kırçın vadisindən “Bişkek Arena”ya: Köçəri irsin dünya səhnəsinə çıxışı – Reportaj
• Jorj Sand, Corc Eliot, Karrer Bel... - Tanınmış qadın yazıçılar niyə kişi təxəllüsü ilə yazırdılar?