Cavid Zeynallı:

Qısqanclıq hissinin həddən artıq olması insanın psixoloji müqavimət hissinin zəifləməsinə gətirib çıxarır. Eyni zamanda bu hal insan xarakterinə və vərdişlərə mənfi təsir edir, onları dəyişir. Qısqanclığın mənbəyi şübhədir. Ürəyə şübhə toxumu düşdüsə, demək qısqanclıq hissini boğmaq çətin olacaq. Bu hiss özünü müxtəlif emosiyalarla büruzə verir. Məsələn, həyəcan, qorxu və qəzəblə. Patoloji qısqanclıq ən qorxulu qısqanclıqdır. Buna səbəbsiz qısqanclıq da demək olar. İnsan özü də anlamır ki, kimə və nəyə qısqanır. Bu ifrat qısqanclığın yaranması zamanı özünə qəsd və ya qarşı tərəfə qəsd baş verə bilər. Qısqanclığın müxtəlif səbəbləri olur. Məsələn, insan görkəmindən narazı olur, özünə güvənsizlik və natamamlıq kompleksi yaşayır, xəyanət zədəsi daşıyır və s. İnsan bu hissdən uzaq olmağa çalışırsa, mütləq bunlara əməl etməlidir: etibar etməyi öyrənməlidir, səmimi olmalıdır, özünü heç kimlə müqayisə etməməlidir.

Sevda Sultanova:

“Keçən verilişlərimizdə paxıllığı müzakirə eləmişdik. Qısqanclıqla paxıllıq bəzən hansısa məqamlarda eyniləşə bilər. Amma hər iki anlayış arasında mühüm fərq var. Paxıllıq səndə olmayan nəyisə əldə etmək istəyi, qısqanclıq sahib olduğunu itirmək qorxusudur.

Qısqanclığın meydana gəlmə səbəbləri müxtəlifdir: diqqətin, sevginin catışmazlığı, özünəinamsızlıq, şübhələr və s.

Kişi-qadın münasibətlərində qısqanclığın səbəblərindən biri odur ki, bəzən qarşı tərəf özünün yox, sevdiyinin həyatı ilə yaşayır. Yəni əgər sənin şəxsi maraqların, dost çevrən, sevdiyin işin varsa, özünə vaxt ayırırsansa, o zaman qarşı tərəfin hər addımını izləmək barədə düşünməyəcəksən.

Qısqanclıq hissi həddini keçəndə, xəstəhal mülkiyyətçiliyə çevrilir ”.

İlqar Rəsul:

Qısqanclıqdan əziyyət çəkənlərdən psixoloqa müraciət edənlərin əksəriyyəti belə deyir:

Təsadüfən keçəndə eşitdim, təsadüfən açdım telefonunu SMS gördüm və s.

Belə hallarda onlara sual verilir: Siz telefona baxmaya bilməzsiniz?

Bu suala cavab olaraq çoxları deyir ki, "yox, baxmaya bilmirəm, bacarmıram".

Belələri daim hər şeyi nəzarətdə saxlamaq istəyənlərdir və qısqanclıq da daha çox onlara zərbə vurur. Çoxları başa düşmürlər ki, nikah vətəndaş münasibətlərinin qeydiyyatıdır. Bu məhkəmə hökmü deyil ki, sağa sola addım atanı cəzalandıra bilsin. Yəni nikah münasibətin qeydiyyatıdır. Amma münasibəti gərək qurasan, yaradasan, nizamlayasan. Bu cütlüklərin birgə görməli olduqları işdir. Çox vaxt xüsusilə də gənclər buna hazır olmurlar.

Tövsiyə:

İstər qadın olun, istər kişi, əgər qarşı tərəf daim sizi nəzarətdə saxlayır, telefonunuzu yoxlayır, danışıqlarınızı dinləyir, hər şeyə burnunu soxursa, bu artıq sevgi deyil, xəstəlikdi. Elə adamı həyatınızdan rədd edin.