Xumar Qədimova Nəsimin “Neylərsən” qəzəlinə musiqi bəstələyib

Bu barədə Kulis.az-a açıqlama verən müğənni bildirib ki, zaman-zaman bir çox şairlərimizin şeirlərinə mahnı bəstələsə də Nəsimi yaradıcılığı həmişə onun üçün aktual olub.

“Mənim ifamda dinlədiyiniz mahnılar, əsərlər bir günün içərisində yaranmır. Bunlar hamısı illərdir içimdə doğulub, mənimlə yaşayıblar. Uzun illər mən tez-tez dəyərli şairlərimizin yaradıcılığına müraciət etmişəm. Nəsimi də neçə vaxt idi mənim içimdə, ürəyimdə idi. Çox istəyirdim ki, onun bir qəzəlinə musiqi bəstələyim, ifa edim. Nəsiminin ən çox sevdiyim qəzəllərindən biri “Neylərəm”dir. Amma mən onun adını öz bəstəmdə “Dilbəra” qoymuşam. Əslində, başqa bir şairin əsərini bəstələyirdim. Amma “Nəsimi ili” olduğu üçün “Dilbəra” bəstəsini xüsusi olaraq tamamlayıb ifa etdim. Şükürlər olsun ki, çox sevdiyim bir qəzəli nəğməyə çevirdim. Möhtəşəm kompozisiya, gözəl bir iş alındı. Mahnının klip çəkilişləri də artıq başa çatıb. Çalışmışam ki, öz düşüncələrimi, fikirlərimi tamaşaçılara, dinləyicilərə çatdırım.”

İfa və kliplə bağlı bəzi məqamların sürpriz qalmasını istəyən müğənni bildirib ki, “Dilbəra” mahnısının klipi yaxın günlərdə dinləyicilərə təqdim olunacaq.

Müğənni hal-hazırda Məhəmmədhüseyn Şəhriyarın “Yar qasidi” şeiri üzərində işlədiyini qeyd edib.

• Erməni komissarın sürgünə göndərdiyi qadın - Hüseyn Cavid niyə hər gün onlara gəlirdi?
• Balaca tabutu balaca qız aparır ağlaya-ağlaya - Günün şeiri
• İsabelle Rossellininin yeni rolu açıqlandı