Ötən gün İran rejissoru Əsgər Fərhadinin “Hamı bilir” filmi ilə başlayan 71-ci Kann kinofestivalının açılışında dünya məşhurları, müxtəlif ölkələrin aparıcı kinematoqrafları iştirak edib.

Kulis.az-ın rus mətbuatına istinadən verdiyi xəbərə görə, festival rəhbərliyinin foto çəkdirmək qadağasına baxmayaraq, aktrisa və modellər qırmızı xalı üzərində foto və selfi çəkilişləri ediblər.

Kino cameəsinin Vaynşteynlə başlayan cinsi təcavüz qalmaqalından sonra festival rəhbərliyi selfi qadağasından əlavə də bəzi tədbirlər görməyi qərara alıb. Belə ki, festival boyunca kömək istəyənlərə cavab vermək üçün qaynar xətt açılıb. Bundan əlavə, festivala qatılanlara cinsi təcavüz haqda maarifləndirici broşürlər paylanılıb.

Xatırladaq ki, festivalın əsas müsabiqə proqramı 12 gün çəkəcək və mayın 19-da başa çatacaq.

Penelopa Kruz və Xavyer Bardemin rol aldığı “Hamı bilir” filmindən başqa əsas müsabiqə proqramında rejissor Jan Lyuk Qodarın, Cəfər Pənahinin, Stefan Brizin, Kiril Serebrennikovun, Kristofer Onorenin filmləri yarışacaq.

Müəllif kinosundan başqa bu il Kann festivalında kütləvi kino da nümayiş olunacaq. “Solo. Ulduz müharibələri: tarixçələr” filmi bu qəbildəndir.

Həmçinin festivalda Vim Vendersin yeni filmi “Fransisk ata. Söz adamı” xüsusi nümayişi təşkil olunacaq.

Kulis.az açılışdan olan fotoları təqdim edir.

• "Oskar"lı ulduzdan böyük layihə
• Xankəndidəki Mədəniyyət Mərkəzində səhnə fəaliyyəti üçün şərait yaradıldı
• "Ağrıdan hıçqırmaq istəməyimi..." - Firəngiz Əlizadə nəyi etiraf etmişdi?