Son günlərdə gündəmi zəbt edən bir məsələ var. ANS-də bir verilişdə aparıcının dindar xanımlarla bağlı səsləndirdiyi fikir ətrafında yaranan olaylar. Məlum olduğu kimi aparıcı xanım bilərəkdən və ya bilməyərəkdən dindar xanımlarla "bayquş" arasında bənzətmə aparıb və bu Bakı kəndlərində ajiotaja səbəb olub. Kəndin dindarları iki ayaqlarını bir başmağa dirəyiblər ki, bəs aparıcı üzr istəməlidir, yoxsa qan töküləcək.

İslamda tolerantlıq var, qan tökmək yoxdur. Bəs o zaman niyə onlar qanla hədələdi?

Dindarlar istədiklərinə nail oldular. Aparıcı üzr istədi və işdən çıxarıldı. Bəs o dindarlar nə əldə etdi? Onlar öz aləmlərində bu dəqiqə hərəkətləri ilə cənnəti satın aldıqlarını düşünürlər.

Sosial şəbəkələrdə hətta verilişdə iştirak edən Hacı Təyyarın da üzr istəməsi tələb edilir və bunu onunla əsaslandırırlar ki, o da aparıcı xanıma səsləndirdiyi məsələdə dəstək verib. O zaman mən o şəxslərə belə bir sual verirəm: siz hər zaman haqqı müdafiə edirsiniz?

Hər zaman haqqın yanında olsaydınız digər bir kanalda hər gün təkrarlanan olaya reaksiya verərdiniz. Sosial-analitik-tok şouda aparıcı verilişin sponsoru olan xəz dəriləri tərif edəndə Hacı Sədi və Cümə məscidinin axundu Hacı Surxay susanda niyə haqqı tələb etmirdiniz? Axı hamımız gözəl bilirik o xəz dəriləri hazırlamaq üçün heyvanları diri-diri soyurlar ki, dərinin parıltısı və keyfiyyəti itməsin. Bəs o zaman niyə o din xadimləri ekspert kimi iştirak etdikləri proqramda susurdu, demirdi ki, ay camaat almayın bu xəz dəriləri, günahdır?

Belə məsələlərdə oturub əmmamənizi qabağınıza qoyub düşünün bir az. Tez qərar çıxartmayın. ”Asaram-kəsərəm”lə işlər düzəlmir, əksinə siz cəmiyyətdə “terrorçu”, “başkəsən” obrazı yaradırsınız. Bu isə yalnız və yalnız sizə zərərdir. Dindar olmaqdansa müsəlman olmağa çalışın, başınızı qaldırıb kitab oxuyun, narahat olmayın bu günah deyil və unutmayın ki, bu ölkədə sizdən başqa da insanlar var.

ANS telekanalının rəhbərliyindən isə bir tamaşaçı kimi yalnız rica edə bilərəm ki, aparıcı işinə bərpa edilsin. Ən azından ona görə ki, kimisə çörəksiz qoymaq dinimizdə yolverilməzdi.

• Tanrıyla yan-yana gedirdi o qadın - Günün şeiri
• Rəşad Məcid haqqında kitab çap olundu
• “Oyanış” adlı konsert proqramı baş tutub