Yaponiyanın ən nüfuzlu “Genre Celebration” festivalında “Şollerin arxivi” bədii filminin uğurundan sonra azərbaycanlı rejissorun ikinci filmi - “Edam günü” də festivala qəbul olunub.

Bu barədə filmin ssenari müəllifi və baş prodüseri Cəlaləddin Qasımov məlumat verib.

Onun sözlərinə görə, “Edam günü” bədii filminə də “Best Drama Feature” (“Ən Yaxşı Dram – Bədii”) nominasiyası təqdim edilib.

Rejissor bildirib ki, “Edam günü” psixoloji trillerində hadisələr sovet dövrünün son illərində həbsxanada cərəyan edir.

C.Qasımov deyib ki, ekran əsərinin çəkilməsində məqsəd istedadlı gəncləri üzə çıxarmaq, onların qabiliyyətini geniş kütləyə göstərməkdir.

“Ekran əsərində məhkum olunmuş bir dustağın kamerada yaşadığı həyəcanlı anlar əks olunub. Filmin ssenarisini yazarkən Bayıl həbsxanasında keçmiş sovet dövründə işləmiş işçilərlə görüşüb maraqlı məlumatlar toplamışam”, - deyə ssenari müəllifi bildirib.

Filmdə rolları Rövşən Kərimduxt, Sabir Məmmədov, Məmməd Əliyev, Nazil Ağalarov, Ramin Şıxəliyev, Soltan Qasımov, Hikmət Məmmədov, Vüqar Qurbanov və digərləri canlandırıblar. Filmin quruluşçu operatoru Mehdi Yaqubovdur. “SPP Production” tərəfindən istehsal edilən ekran əsərinin xronometrajı 95 dəqiqədir.

Qeyd edək ki, Azərbaycanda istehsal edilmiş “Şollerin arxivi” bədii filmi də adı çəkilən festivalda 3700 film arasından altı filmə verilən “Best Drama Feature” nominasiyasına layiq görülmüşdü. /azertag.az/

• Ədəbiyyat qalmaqalı: Britaniyalı yazıçının yeni kitabı Natali Portmanı niyə qəzəbləndirdi?
• Borçalı aşıqlarının sənət dünyası təqdim olunacaq
• Tramp pop-mədəniyyət həvəskarlarının hədəfində - Səbəb