Mayın 8-də görkəmli Azərbaycan bəstəkarı, SSRİ Xalq artisti, professor Soltan Hacıbəyovun anadan olmasının 100 illiyi tamam olur.

Bu münasibətlə musiqi ictimaiyyətinin nümayəndələri Fəxri xiyabanda bəstəkarın xatirəsini andılar. Məzarı önünə tər çiçək dəstələri qoyaraq xatirəsinə ehtiramlarını bildirdilər.

Mərasimdə çıxış edən Azərbaycan Bəstəkarlar İttifaqının sədri, Xalq artisti Firəngiz Əlizadə Soltan Hacıbəyovun 100 illik yubileyinin qeyd edilməsi haqqında Prezident İlham Əliyevin 1 aprel 2019-cu il tarixində sərəncam imzaladığını diqqətə çatdırdı. Bildirdi ki, sərəncama uyğun olaraq sənətkarın yubileyi ilə bağlı ölkəmizdə silsilə tədbirlər keçiriləcək.

Qeyd olundu ki, Azərbaycan mədəniyyətində silinməz iz qoyan məşhur Hacıbəyovlar nəslinin nümayəndəsi olan Soltan İsmayıl oğlu Hacıbəyov 1919-cu ildə Azərbaycanın musiqi beşiyi sayılan Şuşada anadan olub. 1930-cu ildə ikiillik ibtidai məktəbi bitirdikdən sonra Bakıya köçərək əmisi dahi Üzeyir Hacıbəylinin evində yaşayıb. 1936-cı ildə Musiqi Texnikumuna daxil olan Soltan truba sinfində təhsilini davam etdirib. 1939-cu ildə Azərbaycan Dövlət Konservatoriyasının Bəstəkarlıq fakültəsinə, professor Boris Zeydmanın sinfinə daxil olub. Burada xalq musiqisinin əsaslarını Üzeyir bəydən öyrənib. Bəstəkarın müxtəlif janrlarda yaratdığı əsərlər Azərbaycanın musiqi mədəniyyətini zənginləşdirib.

Bakı Musiqi Akademiyasının rektoru, Xalq artisti Fərhad Bədəlbəyli, Azərbaycan Bəstəkarlar İttifaqının katibi, professor Zemfira Qafarova çıxış edərək Soltan Hacıbəyovun həyat və fəaliyyətindən danışdılar. Vurğulandı ki, bəstəkar iki simfoniyanın, “Gülşən” baletinin, “İsgəndər və çoban” uşaq operasının, “Qızılgül” musiqili komediyasının, “Karvan” simfonik lövhəsinin, simfonik, kamera və xalq çalğı alətləri orkestrləri üçün müxtəlif həcmli əsərlərin müəllifidir. Soltan Hacıbəyov 1969-1974-cü illərdə Azərbaycan Dövlət Konservatoriyasının rektoru olub. 19 sentyabr 1974-cü ildə vəfat edib.

Mərasimdə bəstəkarın ailəsi adından çıxış edən gəlini, tanınmış pianoçu, Xalq artisti, professor Ülviyyə Hacıbəyova sənətkarın xatirəsinə göstərilən ehtirama görə minnətdarlığını bildirdi.

• Belə bir ölkəyə altı qol vurub sevinmək utanc hissini itirməkdir
• “İlin fotosu” seçildi
• Məşhur ifaçıya qarşı plagiat ittihamı