Vladiqafqazda Şimali Osetiya Dövlət Akademik Teatrında Əməkdar incəsənət xadimi, yazıçı-dramaturq Əli Əmirlinin məşhur “Varlı qadın” komediyasının növbəti premyerası olub.

Tamaşanın quruluşçu rejissoru Azərbaycan Dövlət Gənc Tamaşaçılar Teatrının baş rejissoru, Əməkdar incəsənət xadimi Bəhram Osmanovdur.

Böyük maraqla qarşılanan səhnə əsərinin nümayişindən sonra Şimali Osetiyanın mədəniyyət naziri Çermen Dudayev Şimali Osetiya - Alaniya Respublikasının başçısı Vyaçeslav Bitarovun tamaşanın müəlliflərinə ünvanladığı təbrik məktubunu oxuyub.

“Azəri” Azərbaycan Milli-Mədəni Mərkəzinin rəhbərləri tamaşanın ərsəyə gəlməsində iştirak etmiş yaradıcı heyətin üzvlərini mükafatlandırıblar.

Qeyd edək ki, artıq 20 yaşı tamam olan “Varlı qadın” ilk dəfə 1999-cu ildə mərhum rejissorumuz Hüseynağa Atakişiyevin quruluşunda tamaşaya qoyulub. Sonralar əsər Akademik Milli Dram Teatrında, həmçinin ölkənin bütün aparıcı teatrlarında, habelə 10-a yaxın xarici ölkə teatrında səhnələşdirilib. Vladiqafqaz teatrındakı tamaşa komediyanın iyirminci yubiley premyerası olub.

• “Tariximizin işığında - Qərbi Azərbaycanın izi ilə” layihəsi başladı
• AYB-nin Mingəçevir bölməsinin 25 illiyi qeyd edildi
• Kələkbaz dul qadın - Elçinin təqdimatında