Ötən həftə Laçın qaçqınlarının məskunlaşdığı Ağcabədi rayon Taxtakörpü qəsəbəsində tanınmış şair İlham Qəhrəmanın yaradıcılığına həsr olunmuş “Yurd səsi” adlı ədəbi-bədii gecə keçirilib.

Kulis.azın verdiyi xəbərə görə, Laçın Mədəniyyət Mərkəzinin hazırladığı tədbirdə şairin özü də iştirak edib. Mədəniyyət Mərkəzinin salonunda məktəblilərdən tutmuş ahıl laçınlılara qədər hər nəslin nümayəndəsi olub.

Laçın aşıqlarından Aşıq Təbriz Axundov, Aşıq Xəlil İmranov, Aşıq Nizami Şirinov və Aşıq Vidadi Mövlamverdiyevin ifasında həmyerlilərinin yaradıcılığından seçmə şeirlərin ifası tədbiri daha da yaddaqalan edib.

Məktəblilər tərəfindən şairin şeirlərinin ifası yurd həsrəti çəkən laçınlıların zövqünü oxşayıb, onlara duyğulu anlar yaşadıb.

Eyni zamanda rayon ziyalıları İlham Qəhrəmanın yaradıcılığının özəlliklərindən bəhs edən çıxışlar ediblər və belə tədbirlərin doğma Laçında keçirilməsini arzulayıblar. Tədbir boyu şairin həm öz yaradıcılığından, həm də laçınlılardan vaxtilə topladığı folklor mətnlərindən bədii nümunələr söyləməsi tədbirə xoş bir ortam qatıb.

Sonda şair tədbiri hazırlayanlara və iştirakçılara təşəkkürünü bildirib və oxuculara öz kitablarını hədiyyə edib.

• "Onun adı musiqi kollecindən də götürülüb..." - Asəf Zeynalıyya Fəxri xiyabanda yer yoxdur?
• Filarmoniyanın aprel repertuarı
• Məşhur serial 12 mövsüm sonra başa çatdı