Milli İncəsənət Muzeyində mərhum xalq rəssamı Toğrul Nərimanbəyovun xatirəsinə həsr olunmuş anım tədbiri keçirilib.

APA-nın xəbərinə görə, Azərbaycan Rəssamlar İttifaqının katibi Ağəli İbrahimov T. Nərimanbəyovun həyat və yaradıcılığı haqda tədbir iştirakçılarına ətraflı məlumat verib. O bildirib ki, T. Nərimanbəyov müasir Azərbaycan təsviri sənətinin yetişdirdiyi böyük şəxsiyyətlərdəndir.

A. İbrahimov Toğrul Nərimanbəyovun sovet vaxtı SSRİ xalq rəssamı adına layiq görülən üç azərbaycanlı rəssamdan biri olduğunu diqqətə çatdırıb: "Toğrul istedadlı rəssam, görkəmli incəsənət xadimi, həm də böyük şəxsiyyət idi. Onun həm də gözəl səsi vardı. Toğrul böyük sənətkar olub. O, çağdaş Azərbaycan təsviri sənətində öz rənglərini tapıb, öz yolunu, öz dəst-xəttini yarada bilib. Toğrulu yaratdığı rəsm əsərləri yaşadırdı".

Tədbir musiqi proqramı ilə davam etdirilib.

Qeyd edək ki, Toğrul Fərman oğlu Nərimanbəyov 1930-cu ildə anadan olub. 1950-ci ildə Ə. Əzimzadə adına rəssamlıq məktəbini, 1955-ci ildə isə Vilnüs şəhərində Litva Dövlət Rəssamlıq İnistitutunu bitirib. 1950-ci ildən etibarən bir çox yerli və beynəlxalq sərgilərdə iştirak edib. 1955-ci ildə SSRİ Rəssamlar İttifaqına üzv qəbul edilib. 1964-cü ildə Azərbaycan SSR-in əməkdar, 1967-ci ildə isə xalq rəssamı fəxri adlarına, 1974-cü ildə Azərbaycan SSR-in, 1980-ci ildə isə SSRİ-nin dövlət mükafatına layiq görülüb. 1989-cu ildə SSRİ xalq rəssamı adını alıb. T. Nərimanbəyov Azərbaycanın "İstiqlal" və "Şərəf" ordenləri ilə təltif edilib. O, 2013-cü ildə Fransada vəfat edib.

• “Şuşanın dağları” mahnısına görə təqib edilən sənətkar - Ona "Xan" təxəllüsünü kim vermişdi?
• Həm yaşlı nəslin, həm də gənclərin sevimlisi Nəriman Həsənzadə... - Qəzənfər Paşayev
• Hikmət Hacıyev: "İşğal illərində tarixi abidələr “bərpa” adı altında xarici müdaxilələrə məruz qalıb"