Zaur Kamala çətin suallar

Zaur Kamala çətin suallar
29 mart 2015
# 14:16

“Xəzər” televiziyasında yer alan “Beşdə beş”, “Ay Zaur” proqramlarının aparıcısı Zaur Kamaldan müsahibə almaq üçün hardasa bir həftə cəhd göstərdim...

Əvvəlcə, mobil telefonuna zəng vurdum. Telefonu açdı, özümü təqdim edib müsahibə almaq istədiyimi dedim. “Bir azdan zəng vurarsız” dedi. Cavabın könülsüz intonasiyasından hiss elədim ki, növbəti zənglərimdə telefonu açmayacaq.

İntuisiyamın xəbərdarlığına rəğmən, sonradan israrla bir neçə dəfə də zəng vurdum.

Və təbii ki, cavab verilmədi.

Sonra öyrəndim ki, “Xəzər” televiziyasının əməkdaşları kanalın rəhbərliyinin izni olmadan müsahibə vermirlər.

Zaur Kamal da bir tanışıma bildirmişdi ki, müsahibəyə hazırdır, amma öncə rəhbərliyin razılığı olmalıdır.

Ona görə “Xəzər” televiziyasının Proqramlar Departamentinin rəhbəri Rüstəm Məmmədova aşağıdakı məzmunda məktub ünvanladıq:

“Hörmətli Rüstəm müəllim!

“Biz Kulis.az mədəniyyət saytı olaraq, “Xəzər” televiziyasının əməkdaşı Zaur Kamaldan müsahibə almaq arzusundayıq. Müsahibədə Z.Kamalın aparıcısı olduğu verilişlərlə, telejurnalistikada peşəkarlıq, etik məsələlərlə bağlı suallar ünvanlanacaq. Həmkar olduğumuzu nəzərə alaraq, demokratik, fikir azadlığı prinsiplərini əldə rəhbər tutacağınıza inanır, bu müsahibəyə razılıq verəcəyinizə ümid edirik”.

Məktubu həm televiziyanın e-mail ünvanına, həm də poçtla göndərdik. Amma üstündən bir aydan çox vaxt keçsə də məktuba cavab gəlmədi.

Sosial şəbəkələrdə aparıcılığı, davranışı, peşəkarlığı müzakirə olunan, bir qisminin sevdiyi, bir qismində isə qıcıq doğuran, Zaur Kamala aşağıdakı sualları ünvanlamaq niyyətində idim.

- Aparıcılığınız, müsahiblərlə davranışınız, proqramlarınızın məzmunu, səviyyəsi çox müzakirə olunur. Sizin efirdə formalaşan obrazınızı gerçəklik kimi qəbul etməliyik, yoxsa bu obraz arxasında tanımadığımız, fərqli bir Zaur var?

- Azərbaycan teleməkanında sizin kimi uzunmüddətli şou aparıcısı qalmaq üçün hansı keyfiyyətlər tələb olunur?

- Tez-tez vurğulayırsız ki, tamaşaçıları əyləndirməyə çalışırsız. Bir əyləncə və şou proqramının kriteriyaları sizin üçün nədən ibarətdir? Və ya şou yalnız müğənniləri efirə dəvət edib oxutmaq, küsülüləri barışdırmaq anlamına gəlirmi?

- “Beşdə beş” proqramına başlayanda əminliklə deyirsiz ki, hər kəs işdən evə sizin proqramı izləmək üçün tələsir, ailəlikcə baxırlar. Belə iddialı fikir nədən qaynaqlanır? Təbii ki, reytinq amili də var. Amma reytinq göstəricilərinin şübhəli olduğunu nəzərə alsaq, bu, “hamı baxır” iddiasına əsas verirmi?

- Nəyə əsasən deyirsiz ki, sizin proqramlar ailə üçün nəzərdə tutulur? Sizin proqramlarda ailəvi olan konkret nədir?

- Publikanızın kimliyi sizin üçün önəmlidirmi?

- Proqramda deyirsiz ki, sizin üçün səviyyəni qorumaq əsasdır. O zaman sizin proqramları səviyyənin meyarıdırmı?

- Həmkarlarınızdan kimi özünüzə rəqib sayırsız?

- Müsahibələrinizdən birində demisiz ki müğənnilərlə işləmək zülmdür. Alternativ proqramda işləməyi düşünmüsüzmü?

- Sizi başqa şou aparıcılarından hansı keyfiyyətlər fərqləndirir?

- Müsahiblərinizlə bəzən aşağılayıcı tonda danışırsız. Bu, jurnalistika qanunlarına, peşəkarlığa zidd deyilmi?

# 2581 dəfə oxunub

Oxşar xəbərlər

Eşqin tərifini verən yazıçı - Əlibala Hacızadə haqqında

Eşqin tərifini verən yazıçı - Əlibala Hacızadə haqqında

18:39 15 sentyabr 2025
Bələdiyyə seçkiləri, töhmətlər... - Brilliant Dadaşovaya niyə qadağa qoyulmuşdu?

Bələdiyyə seçkiləri, töhmətlər... - Brilliant Dadaşovaya niyə qadağa qoyulmuşdu?

17:52 15 sentyabr 2025
Nazim Hikmətlə dostluğuna dair  kitab yazan  yazıçı -  Orxan Kamal Bolqarıstana niyə getmişdi?

Nazim Hikmətlə dostluğuna dair kitab yazan yazıçı - Orxan Kamal Bolqarıstana niyə getmişdi?

16:00 15 sentyabr 2025
Dövlət Turizm Agentliyi Gəncə və Göygölə infotur təşkil edib

Dövlət Turizm Agentliyi Gəncə və Göygölə infotur təşkil edib

15:19 15 sentyabr 2025
Avroviziyadan İsraillə bağlı 2 şərt

Avroviziyadan İsraillə bağlı 2 şərt

14:53 15 sentyabr 2025
"Mən görmədiklərimi yaza bilmərəm..." -  Həmidə xanımın  imtina cavabının səbəbi nə idi?

"Mən görmədiklərimi yaza bilmərəm..." - Həmidə xanımın imtina cavabının səbəbi nə idi?

14:30 15 sentyabr 2025
#
#
Ana səhifə Yazarlar Bütün xəbərlər