Azərbaycan Gənclər Fondu və “İrəli” İctimai Birliyinin dəstəyi ilə həyata keçirilən “Vətən üçün oxu” layihəsinin təqdimat mərasimi keçirilib.

Kulis.az xəbər verir ki, mərasimdə 50-yə yaxın gənc iştirak edib.

Təqdimatda çıxış edən “İrəli” İctimai Birliyinin əməkdaşı, “Vətən üçün oxu” layihəsinin rəhbəri Aydın Abdullayev tədbir iştirakçılarını salamlayaraq, layihə çərçivəsində baş tutan fəaliyyətlərə göstərilən dəstəyə görə Azərbaycan Gənclər Fondu və “İrəli” İctimai Birliyinə təşəkkürünü bildirib. O qeyd edib ki, layihə çərçivəsində çəkilişlər Bakı şəhəri, İsmayıllı, Şəki, Qax və Qəbələ rayonlarında baş tutub. Gənc musiqiçilərin ifasında lentə alınan çəkilişlərdə milli yaradıcılıq nümunələrindən olan “Sarı Gəlin”, “Fəridəm”, “Getmə, gəl” mahnıları, habelə balaban, tar, kamança və nağara kimi milli musiqi alətlərimizdən də istifadə olunub.

Həmçinin diqqətə çatdırılıb ki, layihənin əsas məqsədi istedadlı gənclərimizin tanıdılmasında yardımçı olmaq, habelə Azərbaycan musiqisi və milli musiqi alətlərimizin təbliğində yaxından iştirak etməkdir.

Tədbirin davamında “Vətən üçün oxu” layihəsi çərçivəsində hazırlanmış videoçarxların təqdimatı baş tutub. Daha sonra çəkilişlərdə iştirak etmiş gənc musiqiçilər layihə ilə bağlı öz təəssüratlarını bölüşüblər.

Qeyd edək ki, layihə Azərbaycan Gənclər Fondunun elan etdiyi “İdeyanı Reallaşdır 2022” Gənclərin Fərdi Layihələr Qrant Müsabiqəsi çərçivəsində keçirilir. Layihə çərçivəsində hazırlanmış videoçarxlara aşağıdakı link vasitəsilə keçid edə bilərsiniz: https://bit.ly/43ruGiC

• "Ağrı “işlənməli” və yumora çevrilməlidir..." - Nobel mükafatçısından sitatlar
• Məşhur repçinin Rusiya konserti təxirə salına bilər
• Əməkdar artist Züleyxa Hacıyeva vəfat etdi